ශ්රී ලංකාවේ ප්රමුඛතම පෞද්ගලික අංශයේ ඉන්ධන බෙදාහරින්නා වන ලංකා IOC සමාගම තම පිරවුම්හල් ජාලය හරිත බලශක්ති පරිවර්තනයක් කරා යොමු කිරීමට තීරණය කර ඇත. ඒ අනුව ඉදිරි වසර දෙකක කාලය තුළ දිවයින පුරා පිහිටි සිය සමාගම සතු සහ ෆ්රැන්චයිස් පිරවුම්හල් 273කම විදුලි වාහන (EV) ආරෝපණ මධ්යස්ථාන ස්ථාපිත කිරීමට සැලසුම් කර තිබේ.
මෙම ව්යාපෘතිය සඳහා ලංකා IOC සමාගම LOLC සමූහයට අයත් ඉෂාරා ට්රේඩින් ආයතනය සමඟ අවබෝධතා ගිවිසුමකට එළඹ ඇති අතර, මෙය මෙරට ඉන්ධන බෙදාහැරීමේ ක්ෂේත්රයේ සිදුවන දැවැන්තම හරිත බලශක්ති පරිවර්තනයක් ලෙස සැලකේ.
මෙම ව්යාපෘතිය හරහා ඉදිරි මාස හය තුළ පිරවුම්හල් 75ක සහ මාස 18ක් ඇතුළත පිරවුම්හල් 175ක EV ආරෝපණ පහසුකම් ලබා දීමට ඉලක්ක කර ඇත. නාගරික ප්රදේශවලින් ආරම්භ කර ක්රමයෙන් ග්රාමීය මට්ටමේ පිරවුම්හල් දක්වා මෙය ව්යාප්ත කිරීමට නියමිතය. මෙය සාම්ප්රදායික ඉන්ධන විකුණුම්වලට පමණක් සීමා නොවී නව ව්යාපාරික ක්ෂේත්ර වෙත ප්රවේශ වෙමින් දිගුකාලීන ආර්ථික වටිනාකමක් නිර්මාණය කිරීමේ උපාය මාර්ගයකි.
ලංකා IOC කළමනාකාර අධ්යක්ෂ කේ. රඝු මහතා සඳහන් කළේ වර්තමානයේ සමාගමේ ආදායමෙන් 76%ක්ම ලැබෙන්නේ ඉන්ධන ව්යාපාරයෙන් බවත්, අනාගත ලාභදායිත්වය සහ තිරසාර බව සඳහා මෙවැනි විවිධාංගීකරණයන් අත්යවශ්ය බවත්ය. 2025/26 මූල්ය වර්ෂය සඳහා සමාගම රුපියල් බිලියන 10.56ක ශුද්ධ ලාභයක් වාර්තා කර ඇති අතර, නවීකරණය කරන ලද පිරවුම්හල් ජාලය මගින් සමාගමේ තරගකාරිත්වය තවදුරටත් ඉහළ යනු ඇතැයි අපේක්ෂා කෙරේ.
