ඩබ්ලිව්. එම්. මෙන්ඩිස් සහ සමාගම විසින් රජයට ගෙවිය යුතු රුපියල් මිලියන 5,800ක් වටිනා හිඟ වැට් බදු මුදල්, අතපසු කිරීමකින් තොරව ගෙවා නිම කරන්නේද නැද්ද යන්න වහාම අධිකරණයට දැනුම් දෙන ලෙස කොළඹ අතිරේක මහේස්ත්රාත් ඕෂද මිගාර මහාරච්චි මහතා එම සමාගමේ අධ්යක්ෂ අර්ජුන ජෝසප් ඇලෝසියස් මහතාට නියෝග කළේය. 2023 පෙබරවාරි මස සිට මාසිකව රුපියල් මිලියන 5 බැගින් ගෙවීමට අදාළව ඉල්ලා තිබූ සහනයද අධිකරණය විසින් මෙහිදී ප්රතික්ෂේප කරනු ලැබීය.
දේශීය ආදායම් කොමසාරිස්වරයා විසින් 2016-2017 වර්ෂවලට අදාළ රුපියල් මිලියන 996ක බදු මුදලක් අයකර ගැනීම සඳහා පවරා ඇති නඩුව කැඳවූ අවස්ථාවේදී මෙම නියෝගය නිකුත් කෙරිණි. නඩු විභාගයේදී විත්තිකාර පාර්ශ්වය පවසා සිටියේ, සමාගමේ මත්පැන් බලපත්ර අත්හිටුවීම සහ නිෂ්පාදනාගාර වෙන්දේසි කිරීමට යොමු කිරීම හේතුවෙන් මූල්යමය දුෂ්කරතා පවතින බවත්, එම නිසා බදු වාරික සංශෝධනය කිරීමට අවසර දෙන ලෙසත්ය. කෙසේ වෙතත්, බදු මුදල් අය කරගැනීමට නියමිත කාලය ඉක්මවා ගොස් තිබීම සහ විශාල හිඟ බදු මුදලක් පවතින බැවින් කිසිදු සහනයක් ලබා නොදිය යුතු බවට දේශීය ආදායම් කොමසාරිස්වරයා ඉදිරිපත් කළ කරුණු සලකා බලා මහේස්ත්රාත්වරයා මෙම නියෝගය නිකුත් කළේය.
මීට අමතරව, අදාළ සමාගමේ අධ්යක්ෂවරුන්ට එරෙහිව දේශීය ආදායම් කොමසාරිස්වරයා විසින් නඩු පහක් පවරා ඇති බවත්, 2019-2020 වසරවලට අදාළ බදු නොගෙවීම පිළිබඳ නඩුවක් අභියාචනාධිකරණයේ විභාග වෙමින් පවතින බවත් පැමිණිල්ල වෙනුවෙන් පෙනී සිටි නීතිඥවරයා අධිකරණයට පෙන්වා දුන්නේය. මෙම නඩුවේ විමර්ශන ප්රගතිය සැප්තැම්බර් මස 30 වැනි දින අධිකරණයට ඉදිරිපත් කරන ලෙසට දේශීය ආදායම් දෙපාර්තමේන්තුවට නියෝග කෙරිණි.
