හැමිල්ටන් රිසව් බැංකුව (HRB) සහ ශ්‍රී ලංකා රජය අතර පවතින නීතිමය ආරවුලේදී, එම බැංකුව පිටුපස සිටින ප්‍රධාන සහ සැඟවුණු චරිතය ලෙස මතභේදාත්මක මූල්‍ය විශේෂඥයෙකු වන බෙන්ජමින් වේ (Benjamin Wey) නම් කර ඇත. නිව්යෝර්ක් හි දකුණු දිස්ත්‍රික් අධිකරණයට ශ්‍රී ලංකා රජය විසින් ගොනු කර ඇති නවතම අතිරේක නීතිමය සංදේශයක මෙම කරුණු අනාවරණය වේ. හැමිල්ටන් රිසව් බැංකුව විසින් ශ්‍රී ලංකාවේ ස්වෛරී බැඳුම්කර මිලියන 250ක් තමන් සතු බව පවසමින් ගොනු කර ඇති නඩුවට එරෙහිව ශ්‍රී ලංකා රජය මෙම කරුණු ඉදිරිපත් කර ඇත. එම බැංකුවේ හිමිකාරිත්වය සහ බැඳුම්කර මිලදී ගැනීම් පිළිබඳ පවතින අභිරහස් තත්ත්වය හමුවේ, බැංකුව සැබෑ ප්‍රතිලාභී හිමිකරු නොවන බවත්, එමනිසා නඩු පැවරීමට ඔවුන්ට නීත්‍යානුකූල අයිතියක් නොමැති බවත් ශ්‍රී ලංකාව තර්ක කරයි.
හැමිල්ටන් රිසව් බැංකුව මෙම බැඳුම්කර මිලදී ගෙන ඇත්තේ වෙනත් පාර්ශ්වයකගේ ආර්ථික අවශ්‍යතා වෙනුවෙන් බවට ශ්‍රී ලංකාව චෝදනා කරයි. බැංකුව තමන්ගේම ගිණුමක් හරහා ආයෝජනය කළ බව පැවසුවද, ඒ පිළිබඳව කිසිදු මණ්ඩල වාර්තාවක්, ලිඛිත විශ්ලේෂණයක් හෝ තීරණ ගැනීමේ ක්‍රියාවලියක් පිළිබඳ සාක්ෂි නොමැති වීම සැකසහිත බව රජය පෙන්වා දෙයි. හැමිල්ටන් රිසව් බැංකුවේ ප්‍රතිලාභී හිමිකරු ලෙස හඳුනාගෙන ඇති යින්මාවෝ වේ (Yingmao Wei) යනු බෙන්ජමින් වේගේ බෑණා කෙනෙකි. 2015 වසරේදී මූල්‍ය වංචා සහ වත්කම් සැඟවීම සම්බන්ධයෙන් ඇමරිකානු සුරැකුම්පත් හා විනිමය කොමිෂන් සභාව විසින් බෙන්ජමින් වේට එරෙහිව චෝදනා ගොනු කර තිබුණි. මෙම බැංකුවේ නියෝජිතයා ලෙස ඔහු ක්‍රියා කරන බවට නැගෙනහිර කැරිබියානු ශ්‍රේෂ්ඨාධිකරණය මගින්ද නිරීක්ෂණය කර ඇත.
තවද ශ්‍රී ලංකාවට එරෙහිව නඩු පැවරීම සඳහා අනෙකුත් බැඳුම්කර හිමියන් දිරිමත් කිරීම සහ එම නඩුවේ උපායමාර්ගික කටයුතු මෙහෙයවීම බෙන්ජමින් වේ විසින් සිදුකර ඇති බවට හෙළි වී ඇත. මූල්‍ය පුවත්පත් වාර්තා අනුව, ඔහු බැංකුවේ නම ප්‍රසිද්ධියට පත් නොකර නඩු කටයුතු ඉදිරියට ගෙන යාමට උත්සාහ කර තිබේ. නඩු කටයුතු සඳහා අදාළ ලිපි ලේඛන හෝ දුරකථන සන්නිවේදන තොරතුරු හෙළි කිරීමට බැංකුව නිරන්තරයෙන්ම ප්‍රතිරෝධය දක්වයි. විශේෂයෙන්ම, බැඳුම්කර මිලදී ගත් කාලසීමාවට අදාළව බැංකුවේ ප්‍රධාන මූල්‍ය නිලධාරී ඇන්ටෝනියෝ කෙන්යාටාගේ දුරකථන දත්තවල පවතින අඩුපාඩු නඩුවේ විශ්වසනීයත්වයට විශාල බලපෑමක් කර ඇති බව ශ්‍රී ලංකාව ප්‍රකාශ කරයි.
