මත්ද්රව්ය ජාවාරමෙන් උපයාගත් බවට සැක කෙරෙන රුපියල් කෝටි 5.7ක දේපළක් අපරාධ විමර්ශන කොට්ඨාශයේ නීති විරෝධී වත්කම් විමර්ශන ඒකකය විසින් තහනම් කර ඇත. මෙම දේපළවල හිමිකාරිනිය ලෙස සැලකෙන ප්රබල මත්ද්රව්ය ජාවාරම්කාරියක වන මොහොමඩ් ෆවුසි හිදායා නොහොත් ‘Grandpass ලොකු නෝනා’ මේ වන විටත් පලාගොස් සිටියි.
පොලිස්පතිවරයා වෙත ලැබුණු පැමිණිල්ලකට අනුව සිදුකළ විමර්ශනයකදී, උස්වැටකෙයියාව ප්රදේශයේ පදිංචි මොහොමඩ් ෆවුසි හිදායා සහ ඇයගේ සමීපතමයන් නීතිවිරෝධී මත්ද්රව්ය ජාවාරම් මගින් උපයාගත් මුදල් යොදවා මෙම දේපළ අත්පත් කරගෙන ඇති බව අනාවරණය විය. මුදල් විශුද්ධිකරණය වැළැක්වීමේ පනත යටතේ විමර්ශන සිදුකරන අතර, වත්තල ප්රාදේශීය ලේකම් කොට්ඨාසයේ උස්වැටකෙයියාව, පුබුදුගම ප්රදේශයේ පිහිටි රුපියල් කෝටි 5ක පමණ වටිනා දෙමහල් නිවසක් සහ නුගපේ ප්රදේශයේ රුපියල් ලක්ෂ 70ක් පමණ වටිනා නිවසක් හා කඩකාමරයක් මෙසේ දින හතක කාලයක් සඳහා ක්රියා විරහිත කර ඇත. මෙම දේපළ සම්බන්ධයෙන් සහකාර පොලිස් අධිකාරී ජනක විතානගේ මහතා විසින් නියෝග නිකුත් කර ඇති අතර, සැකකරුවන් අත්අඩංගුවට ගෙන වැලිසර මහෙස්ත්රාත් අධිකරණය වෙත ඉදිරිපත් කිරීමට පොලීසිය පියවර ගනිමින් සිටියි.
