ඉන්දීය විවාහ මංගල සැලසුම් වේදිකාවක් වන ‘WedMeGood’ විසින් නිකුත් කරන ලද 2026 ගමනාන්ත විවාහ මංගල වාර්තාවට අනුව, ඉන්දීය ජෝඩු සඳහා වේගයෙන්ම වර්ධනය වන ජාත්යන්තර මංගල ගමනාන්තයක් ලෙස ශ්රී ලංකාව ඉහළ මට්ටමකට පැමිණ තිබේ.
දැනට ඉන්දියාවේ සිදුවන සියලුම විවාහ මංගල්යයන්ගෙන් 25%ක් පමණ ගමනාන්ත විවාහ මංගල්යයන් වන අතර, 2028 වන විට එම අගය 30% සිට 32% දක්වා ඉහළ යනු ඇතැයි අපේක්ෂා කෙරේ. ජාත්යන්තර ගමනාන්ත විවාහ මංගල්යයක් සඳහා සාමාන්ය වියදම ඉන්දීය රුපියල් මිලියන 15 ඉක්මවයි. ශ්රී ලංකාව ඉන්දියාවට ඇති සමීපත්වය, ඉන්දීය සංචාරකයන් සඳහා වීසා රහිත ප්රවේශය, සුඛෝපභෝගී ආගන්තුක සත්කාර, විවිධ භූ දර්ශන මෙන්ම සංස්කෘතික, සුවතා, වනජීවී සහ වෙරළ ආශ්රිත අත්දැකීම් එකම සංචාරක ගමන් පථයක ලබාගත හැකි වීම නිසා ශ්රී ලංකාව ඉහළම ඉල්ලුමක් ඇති ගමනාන්තයක් බවට පත්ව ඇත.
ඉන්දීය විවාහ මංගල්ය සඳහා ශ්රී ලංකාවේ සිදුකරන වෙන් කිරීම් වාර්ෂිකව 20% සිට 25% දක්වා වර්ධනය වනු ඇතැයි ගණන් බලා තිබේ. ඉන්දීය ජෝඩුවලින් 44%ක් පැය දෙකේ සිට හතර දක්වා වූ ගුවන් ගමන් කාලයක් තුළ පිහිටි ගමනාන්ත තෝරා ගැනීමට කැමැත්තක් දක්වන අතර, ශ්රී ලංකාව ඒ සඳහා බෙහෙවින් හිතකර ස්ථානයක පවතී. මීට පෙර 1.8ක්ව පැවති ගමනාන්ත විවාහ මංගල්යයක සාමාන්ය දින ගණන, ජෝඩු වැඩිපුර අත්දැකීම් ලබා ගැනීමට උත්සාහ කිරීම නිසා දැන් දින 3.2ක් දක්වා ඉහළ ගොස් ඇත.
ඉන්දීය විවාහ මංගල්යයන් සැලකිය යුතු පරිවර්තනයකට ලක්වෙමින් පවතින බවත්, පවුලේ අය සහ මිතුරන් සඳහා අර්ථවත් අත්දැකීම් නිර්මාණය කිරීමට ජෝඩු වැඩි අවධානයක් යොමු කරන බවත් ‘WedMeGood’ හි සම-නිර්මාතෘ මෙහාක් ෂාහානි ප්රකාශ කළාය.
