අපරාධකරුවන් හඳුනා ගැනීම සඳහා විශේෂ පුහුණුවක් ලැබූ, නෙදර්ලන්තයේ සිට ශ්රී ලංකාවට රැගෙන ආ ‘ලුසී’ නමැති පොලිස් නිල සුනඛ දෙන, මහනුවර අස්ගිරිය පොලිස් නිල සුනඛ කොට්ඨාසයේදී පැටවුන් අට දෙනෙකු බිහි කර තිබේ. මෑත ඉතිහාසය තුළ අස්ගිරිය පොලිස් නිල සුනඛ කොට්ඨාසයේ සුනඛ දෙනක එකවර පැටවුන් අට දෙනෙකු ප්රසූත කළ පළමු අවස්ථාව ලෙස මෙය සටහන් වන අතර, මෙය ලුසීගේ ද පළමු ප්රසූතිය වේ.
මෙම ප්රසූතියේදී ගැහැනු පැටවුන් පස් දෙනෙකු සහ පිරිමි පැටවුන් තිදෙනෙකු මෙලොවට බිහි වී ඇති අතර, ඔවුන් සියල්ලෝම ඉතා නිරෝගීව පසුවෙති. මෙම නවක සුනඛ පැටවුන්ට මාස හයක කාලයක් සපිරුණු පසු, අපරාධකරුවන් කොටු කර ගැනීම, මත්ද්රව්ය ජාවාරම් වැටලීම සහ පුපුරණ ද්රව්ය සෙවීම වැනි විශේෂිත රාජකාරි සඳහා අවශ්ය විධිමත් පුහුණුව ලබා දීමට පොලිස් නිල සුනඛ කොට්ඨාසය මේ වන විටත් කටයුතු සූදානම් කර ඇත.
ලුසීට තම පැටවුන් සමඟ කාලය ගත කිරීම සඳහා ඉදිරි මාස දෙකක කාලය වෙන් කර දී ඇති අතර, එම කාලසීමාව තුළ ඇයව අපරාධ විමර්ශන මෙහෙයුම් සඳහා යොදා නොගැනේ. මාස දෙක නිම වීමෙන් පසු නැවතත් විශේෂ පුහුණුවක් ලබා දී ඇයව සුපුරුදු රාජකාරි කටයුතු සඳහා අනුයුක්ත කිරීමට නියමිතය.
පසුගිය 2024 වසරේදී නෙදර්ලන්තයේ සිට මෙරටට රැගෙන ආ සුනඛයන් 35 දෙනාගේ කණ්ඩායමට අයත් ලුසී, මේ වන විට තම පැටවුන් කෙරෙහි දැඩි ආරක්ෂක පිළිවෙතක් අනුගමනය කරයි. සහකාර පොලිස් අධිකාරී පශු වෛද්ය අමල් දසනායක, පශු වෛද්ය ඒකකයේ ස්ථානාධිපති උප පොලිස් පරීක්ෂක තිලකරත්න සහ ඇයව හසුරුවන පොලිස් කොස්තාපල් දිනිඳු කුමාර (104983) යන මහත්වරුන්ට හැර වෙනත් කිසිදු නිලධාරියෙකුට පැටවුන් සිටින ස්ථානයට ළඟා වීමට ඇය ඉඩ නොදීම විශේෂත්වයකි.
