විදෙස්ගත ශ්රමිකයන් සඳහා යෝජිත දායක විශ්රාම වැටුප් ක්රමයේ පවතින ගැටලු කඩිනමින් නිරාකරණය කර එය 2027 අයවැය යෝජනාවලට ඇතුළත් කරන ලෙස ජනාධිපති අනුර කුමාර දිසානායක මහතා අදාළ නිලධාරීන්ට උපදෙස් ලබා දී තිබේ. ජනාධිපති කාර්යාලයේදී අද (16) පැවති විදේශ කටයුතු, විදේශ රැකියා සහ සංචාරක අමාත්යාංශයේ ප්රගති සමාලෝචන සහ 2027 අයවැය පූර්ව සාකච්ඡාවේදී ඔහු මෙම උපදෙස් ලබා දුන්නේය. රටට විදේශ විනිමය ගෙන එන ප්රධානතම ක්ෂේත්රයක් වන විදෙස්ගත ශ්රමිකයන් සඳහා විධිමත් විශ්රාම වැටුප් ක්රමයක් හඳුන්වාදීමේ අවශ්යතාව අවධාරණය කළ ජනාධිපතිවරයා, ඒ සඳහා අවශ්ය නීතිමය හා පරිපාලනමය බාධක කඩිනමින් නිරාකරණය කරන ලෙස ද දැනුම් දුන්නේය.
මෙම සාකච්ඡාවේදී සංචාරක සංවර්ධන ව්යාපෘති දිස්ත්රික් මට්ටමින් වඩාත් කාර්යක්ෂමව ක්රියාත්මක කිරීම සඳහා මුදල් ප්රතිපාදන සෘජුවම දිස්ත්රික් ලේකම්වරුන්ගේ මුදල් සංචිත වෙත යොමු කිරීමට තීරණය කෙරුණු අතර, සීගිරිය, ගලේවෙල සහ ත්රිකුණාමලය කේන්ද්ර කරගත් සංවර්ධන ව්යාපෘති අදාළ අමාත්යාංශ සහ දෙපාර්තමේන්තු සමඟ ඒකාබද්ධව ක්රියාත්මක කිරීමට ද උපදෙස් ලැබිණි. තවද ප්රසම්පාදන ක්රියාවලියේ ප්රමාද අවම කිරීම සඳහා ලබන වසරේ ජනවාරි මුල් සතියේ සිටම කටයුතු ආරම්භ කළ හැකි පරිදි මුදල් අමාත්යාංශය හඳුන්වා දී ඇති නව සැලැස්ම අනුගමනය කරන ලෙස ද ජනාධිපතිවරයා නිලධාරීන්ට පැවසීය. එමෙන්ම කොන්සියුලර් සේවා ඩිජිටල්කරණය, සංචාරක අමාත්යාංශය යටතේ පවතින සම්පත් සඳහා දත්ත පද්ධතියක් සකස් කිරීම සහ 2030 වන විට සංචාරක ක්ෂේත්රයට අවශ්ය මානව සම්පත ලක්ෂ 8 දක්වා පුළුල් කිරීම සඳහා හෝටල් පාසල් පුහුණු වැඩසටහන් දියුණු කිරීම පිළිබඳව ද මෙහිදී අවධානය යොමු විය. මෙම අවස්ථාව සඳහා විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා ඇතුළු ජ්යෙෂ්ඨ නිලධාරීන් පිරිසක් සහභාගී වූහ.
