බන්ධනාගාර තදබදය පාලනය කිරීම හුදෙක් පරිපාලනමය කරුණක් ලෙස නොසලකා, එය ජාතික වැදගත්කමක් සහිත කරුණක් ලෙස සලකා කටයුතු කළ යුතු බව රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාව පවසයි. අධිකරණය, පොලීසිය, බන්ධනාගාර දෙපාර්තමේන්තුව සහ අනෙකුත් අදාළ ආයතන අතර මනා සම්බන්ධීකරණයක් ඇති කරමින් බන්ධනාගාර පද්ධතියේ පවතින ගැටලු සඳහා දිගුකාලීන විසඳුම් ක්රියාත්මක කිරීමේ අවශ්යතාව මෙම කාරක සභාවේදී අවධාරණය කෙරිණි.
කාරක සභාවේ සභාපති පාර්ලිමේන්තු මන්ත්රී නජිත් ඉන්දික මහතාගේ ප්රධානත්වයෙන් පැවැති රැස්වීමේදී බන්ධනාගාර තදබදය අවම කිරීම සහ කාර්යක්ෂමතාව ඉහළ නැංවීම සඳහා පියවර රැසක් පිළිබඳව සාකච්ඡා විය. මත්ද්රව්ය සම්බන්ධ නඩු සඳහා අවශ්ය රජයේ රස පරීක්ෂක වාර්තා ලබා ගැනීමේ ප්රමාදය අවම කිරීමට එම දෙපාර්තමේන්තුවේ ධාරිතාව ඉහළ නැංවීම, නවීන තාක්ෂණික උපකරණ ලබා ගැනීම සහ පරීක්ෂණ ක්රියාවලිය කඩිනම් කිරීමේ වැදගත්කම කාරක සභාව පෙන්වා දුන්නේය.
එමෙන්ම බන්ධනාගාරවල යටිතල පහසුකම් පුළුල් කිරීම, නව ගොඩනැඟිලි ඉදිකිරීම සහ පවතින පහසුකම් ප්රතිසංස්කරණය කිරීම මගින් රැඳවූවන් කාර්යක්ෂමව කළමනාකරණය කිරීමට යෝජනා විය. බන්ධනාගාර දෙපාර්තමේන්තුවේ පවතින මානව සම්පත් හිඟය අවම කිරීම සඳහා නව බඳවා ගැනීම් සිදු කිරීම, බඳවා ගැනීමේ ක්රමවේද සංශෝධනය කිරීම සහ බන්ධනාගාර නිලධාරීන්ගේ සේවා තත්ත්වය වැඩිදියුණු කිරීම පිළිබඳවද මෙහිදී විශේෂ අවධානයක් යොමු කෙරිණි. මෙම කාරක සභා රැස්වීමට රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ සාමාජික මැති ඇමතිවරුන් සහ ජ්යෙෂ්ඨ මන්ත්රීවරුන් රැසක් සහභාගී වූහ
