ආනයනය කරන ලද වාහන 1,025ක් පමණ තවදුරටත් හම්බන්තොට වරායෙන් නිදහස් කර ගැනීමට ආනයනකරුවන් කටයුතු කර නොමැති බව ශ්රී ලංකා රේගුව පවසයි. ශ්රී ලංකා රේගුවේ මාධ්ය ප්රකාශක චන්දන පුංචිහේවා මහතා සඳහන් කළේ, ඉන් වාහන 625ක් මෙරටට ආනයනය කර මාස හයකට අධික කාලයක් ගත වී ඇති බවත්, අදාළ වාහන කිසිවක කිසිදු රේගු වරදක් නොමැති බවත්ය.
කිසිදු රේගු වරදක් නොමැතිව මෙලෙස වරායේ රඳවාගෙන ඇති වාහන රේගු ආඥා පනතේ 129 වන වගන්තිය ප්රකාරව වෙන්දේසි කිරීමට හෝ ටෙන්ඩර් කැඳවා අලෙවි කිරීමට ඉදිරියේදී කටයුතු කරන බව රේගු මාධ්ය ප්රකාශකවරයා අවධාරණය කළේය. මෙරටට ගෙන්වන ඕනෑම භාණ්ඩයක් මාසයක් ඇතුළත අදාළ බදු ගෙවා නිදහස් කරගත යුතු අතර, එසේ නොකරන අවස්ථාවලදී පනතේ ප්රතිපාදන යටතේ ඒවා අලෙවි කර රජයට අවශ්ය බදු මුදල් අය කරගැනීමට රේගුවට බලය ඇත.
අදාළ බදු මුදල් සහ වරාය හා ගුදම් ගාස්තු ගෙවීමෙන් අනතුරුව ඉතිරි වන යම් මුදලක් පවතී නම් එය අදාළ ආනයනකරුවා වෙත ලබා දීමට කටයුතු කරන බව හෙතෙම වැඩිදුරටත් පෙන්වා දුන්නේය. කෙසේ වෙතත්, යම් ආනයනකරුවෙකුට සාධාරණ හේතුවක් මත වාහන නිදහස් කරගැනීමට නොහැකි වූ බවට දැනුම්දෙනු ලබන්නේ නම්, ඒ පිළිබඳව විශේෂයෙන් සලකා බැලීමේ හැකියාවක් පවතින බවද රේගුව සඳහන් කරයි.
