යුනයිටඩ් මෝටර්ස් ලංකා පීඑල්සී හි පූර්ණ අනුබද්ධිත සමාගමක් වන යුනිමෝ එන්ටර්ප්රයිසස් ලිමිටඩ් ශ්රී ලංකාවේ Perodua සන්නාමයේ නවතම මාදිලි වන Perodua Traz ආසන 5ක SUV රථය සහ Perodua Alza ආසන 7ක MPV රථය නිල වශයෙන් එළිදක්වා තිබේ. කොළඹ සිනමන් ලේක්සයිඩ් හෝටලයේ පැවති උත්සවයකදී මෙම නව මාදිලි හඳුන්වාදුන් අතර, මැලේසියානු Perodua සමාගමේ නිලධාරීන්, යුනයිටඩ් මෝටර්ස් සහ යුනිමෝ එන්ටර්ප්රයිසස් කළමනාකාරීත්වය, ව්යාපාරික පාර්ශ්වකරුවන්, මූල්ය ආයතන නියෝජිතයන් සහ පාරිභෝගිකයන් රැසක් ඊට එක්වූහ.
Perodua Traz රථය නාගරික සහ පවුල් භාවිතයට ගැළපෙන 1.5 ලීටර් එන්ජිමකින්, ලීටරයකට කිලෝමීටර් 21.3ක ඉන්ධන කාර්යක්ෂමතාවකින් සහ ASEAN NCAP තරු 5ක ආරක්ෂණ සහතිකයකින් සමන්විත බව සමාගම සඳහන් කළේය. Perodua Alza රථය ආසන 7ක ධාරිතාවක්, 1.5 ලීටර් Dual VVT-i එන්ජිමක්, D-CVT ගියර් පද්ධතියක් සහ ලීටරයකට කිලෝමීටර් 22.0ක ඉන්ධන කාර්යක්ෂමතාවක් ලබාදෙන බව ද නිවේදනය කෙරිණි. සමූහ ප්රධාන විධායක නිලධාරී චානක යටවර මහතා ප්රකාශ කළේ, ඉන්ධන කාර්යක්ෂමතාව, ප්රායෝගික භාවිතය සහ විශ්වාසනීය අලෙවියෙන් පසු සේවාව අපේක්ෂා කරන ශ්රී ලාංකික පාරිභෝගිකයන්ගේ අවශ්යතා මෙම නව මාදිලි දෙක මඟින් සපුරාලන බවයි.
Perodua සමාගම 2025 වසරේදී මැලේසියාවේ වාහන 359,904ක් ලියාපදිංචි කරමින් සියයට 43.9ක වෙළඳපොළ කොටසක් හිමිකරගෙන ඇති අතර, ශ්රී ලංකාවේ මේ වන විට Perodua වාහන 20,000කට අධික සංඛ්යාවක් ධාවනය වන බව යුනයිටඩ් මෝටර්ස් ලංකා පීඑල්සී සඳහන් කළේය. දිවයින පුරා පිහිටි ප්රදර්ශනාගාර සහ බලයලත් සේවා මධ්යස්ථාන ජාලය හරහා අලෙවියෙන් පසු සේවා සැපයෙන අතර, Perodua වාහන සඳහා වසර 5ක හෝ කිලෝමීටර් 150,000ක නිෂ්පාදක වගකීමක් ද හිමිවේ.
