මෙරට භික්ෂූන් වහන්සේලා අප්රසාදයට පත් කරමින් උන්වහන්සේලාට සමාජය හමුවට පැමිණීමට නොහැකි පරිසරයක් නිර්මාණය කිරීමේ කුමන්ත්රණයක් ක්රියාත්මක වන බව ශාසනාරක්ෂක සංඝ සභාවේ සභාපති මණ්ඩල සාමාජික, ජ්යෙෂ්ඨ මහාචාර්ය අගලකඩ සිරිසුමන හිමියන් පවසයි.
ශ්රී ලංකා ප්රදර්ශන සහ සම්මේලන මධ්යස්ථානයේදී “සුඛා සංඝස්ස සාමග්ගී” තේමාව යටතේ පැවැති මහ සඟ සමුළුව අමතමින් උන්වහන්සේ මේ බව සඳහන් කළහ. සම්බුද්ධ ශාසනය ආරක්ෂා කර පෝෂණය කිරීමට ආණ්ඩුක්රම ව්යවස්ථාවෙන් පැවරී ඇති වගකීම සක්රියව ඉටු කරන ලෙස බලධාරීන්ට අවධාරණය කිරීම ඇතුළු කරුණු කිහිපයක් මුල් කරගනිමින් මෙම සමුළුව සංවිධානය කර තිබුණි.
එහිදී වැඩිදුරටත් අදහස් දැක්වූ උන්වහන්සේ කියා සිටියේ සංඝයා වහන්සේලා එකතු වන විට මඩ ප්රහාර එල්ල කරන පිරිසක් සමාජයේ සිටින බවයි. කසාවත පෙරවාගත් භික්ෂූන් වහන්සේලාට නිවට නියාළුව සිටිය නොහැකි බවත්, තමන්ගේ වගකීම් හඳුනාගෙන කටයුතු කළ යුතු බවත් උන්වහන්සේ පෙන්වා දුන්හ.
විදේශගත සංවිධානවල මුදලින් සහ චින්තනයෙන් යැපෙන පිරිස් විසින් මෙරට බලය මෙහෙයවන බවත්, ඔවුන්ට සිවුර තුළ පවතින ජාතික බලය සහ සංස්කෘතික වටිනාකම් දරාගත නොහැකි වී ඇති බවත් සිරිසුමන හිමියන් සඳහන් කළහ. ඉදිරි වසර කිහිපය තුළ භික්ෂූන් වහන්සේලාට පාරට බැසීමට නොහැකි තත්ත්වයක් නිර්මාණය වීමට ඉඩ ඇති බැවින්, ආණ්ඩු පෙරළීමට නොව තමන් වෙත එල්ල වන අභියෝග හමුවේ නොසැලී මහ සංඝරත්නයේ ශක්තිය හා බලය පෙන්වීමට එකතු විය යුතු බව උන්වහන්සේ වැඩිදුරටත් අවධාරණය කළහ.
