නල්ලතන්නියේ සිට මස්කෙළිය දක්වා ධාවනය වූ ත්‍රීරෝද රථයක් මෝහිණි ඇල්ල ප්‍රදේශයේදී ඉකුත් (22) දින මාර්ගයෙන් ඉවතට පැන සිදුවූ බිහිසුණු අනතුරින් බරපතල තුවාල ලබා මහනුවර ශික්ෂණ රෝහලේ හදිසි ප්‍රතිකාර ඒකකයේ ප්‍රතිකාර ලබමින් සිටි 13 හැවිරිදි පාසල් සිසුවියක් අද (30) දින ජීවිතක්ෂයට පත්ව තිබේ.
මෙසේ මරණයට පත්ව ඇත්තේ නල්ලතන්නිය පහළ කොටස, මරේ වත්තේ පදිංචිව සිටි, මස්කෙළිය සෙන් ජෝසප් විද්‍යාලයේ 8 වන වසරේ ඉගෙනුම ලැබූ සෙල්වම් දිෂ්නා නමැති දැරියකි. එකම පවුලේ පිරිසක් ගමන් කරමින් තිබියදී සිදුවූ මෙම අනතුරින් ත්‍රීරෝද රථයේ රියැදුරා සහ පසුපස අසුනේ ගමන් කළ ඔහුගේ ඥාතියෙකු අවස්ථාම ජීවිතක්ෂයට පත් වූහ.
අනතුරින් බරපතල තුවාල ලැබූ අනෙකුත් සිසුන් ප්‍රතිකාර සඳහා රෝහල්ගත කර තිබූ අතර, ඉන් දික්ඔය මූලික රෝහලේ ප්‍රතිකාර ලබමින් සිටි පාසල් සිසුවා මේ වන විට රෝහලෙන් බැහැරව ගොස් ඇති බව නල්ලතන්නි පොලිසිය පවසයි. නල්ලතන්නි පොලිසියේ ස්ථානාධිපති පරීක්ෂක ආර්. නිරෝෂන් මහතාගේ අධීක්ෂණය යටතේ වැඩිදුර විමර්ශන ක්‍රියාත්මක වේ.
