උසස් අධ්යාපන කටයුතු සඳහා ශිෂ්යත්ව මත විදේශගත වන විද්යාර්ථීන් සිය බැඳුම්කර ගිවිසුම් කඩකිරීම හේතුවෙන් පේරාදෙණිය විශ්වවිද්යාලයට අයවීමට ඇති මුදල රුපියල් කෝටි 400කට ආසන්න බව පසුගිය අගෝස්තු 05 වන දින පැවැති කෝප් කමිටු රැස්වීමේදී හෙළිදරව් වී තිබේ.
එහිදී හෙළි වූ කරුණු අනුව පේරාදෙණිය විශ්වවිද්යාලයේ විද්යාර්ථීන් 68 දෙනෙකුගෙන් මෙම මුදල අයකර ගැනීමට ඇති අතර, ඉන් වැඩිම පිරිසක් බැඳුම්කර කඩකිරීම සිදුකර ඇත්තේ වර්තමාන උපකුලපති ටෙරන්ස් මධුජිත්ගේ පාලන කාලය තුළදීය.
දත්තයන්ට අනුව 2020 වසරේදී 03 දෙනෙකුද, 2021 වසරේදී 06 දෙනෙකුද, 2022 වසරේදී 21 දෙනෙකුද, 2023 වසරේදී 15 දෙනෙකුද, 2024 වසරේදී 22 දෙනෙකුද සහ 2025 වසරේදී 26 දෙනෙකුද වශයෙන් බැඳුම්කර ගිවිසුම් කඩකිරීම් වාර්තා වී ඇත. මෙම දත්ත විශ්ලේෂණය කිරීමේදී පෙනී යන්නේ පසුගිය වසර කිහිපය තුළ බැඳුම්කර කඩකිරීම් සීඝ්ර ලෙස ඉහළ ගොස් ඇති අතර, විශේෂයෙන්ම 2024 වසරේ මහාචාර්ය මධුජිත් උපකුලපති බවට පත්වීමෙන් පසුව එම ප්රවණතාව තවත් වැඩි වී ඇති බවයි.
කෝප් කමිටුවේදී අදහස් දැක්වූ උපකුලපති මධුජිත්, මෙම බැඳුම්කර කඩකළ පුද්ගලයන් සොයා ගැනීමට නොහැකි බවත්, ඔවුන් පස්සේ පැන්නීම නුසුදුසු බැවින් සානුකම්පිතව බැලිය යුතු බවත් පවසා ඇත. එසේම ඔවුන් විශ්වවිද්යාලයේ අභිවෘද්ධියට මීට පෙර විශාල මුදලක් පරිත්යාග කර ඇති බව සඳහන් කරමින් එම තත්ත්වය සාධාරණීකරණය කිරීමටද උත්සාහ ගෙන තිබේ. රජයේ අධික බදු අයකිරීම මෙම ගිවිසුම් කඩකිරීමට හේතු වූ බව පැවසූ ඔහු, අදාළ පුද්ගලයන් පිළිබඳ සොයා බැලීම අත්හැර දමා ඇති බවද ප්රකාශ කර ඇත.
උපකුලපතිවරයාගේ මෙම ප්රකාශ සහ හැසිරීම සම්බන්ධයෙන් පේරාදෙණිය විශ්වවිද්යාලයේ විද්වතුන් කිහිපදෙනෙකුම දැඩි විවේචන එල්ල කර ඇත. මහජන මුදල් අවභාවිත වීමක් සම්බන්ධයෙන් වගකිවයුතු රාජ්ය නිලධාරියෙකු ලෙස කටයුතු නොකර, බැඳුම්කර කඩකළ පිරිස ආරක්ෂා කිරීමට කටයුතු කිරීම දැඩි ප්රශ්නගත ක්රියාවක් බවත්, මෙවැනි අක්රමිකතාවලට එරෙහිව රටේ නීතිය තදින් ක්රියාත්මක විය යුතු බවත් එම පිරිස වැඩිදුරටත් පෙන්වා දෙති.
