ශ්‍රී ලංකාවේ දෙමළ භාෂා කතා කරන ජනතාව මුහුණ දෙන පොදු ගැටලු වෙනුවෙන් පෙනී සිටීම සඳහා මෑතකදී ‘පොදු වේදිකාවක්’ (Common platform) පිහිටුවා ගත් දෙමළ සහ මුස්ලිම් දේශපාලන පක්ෂ හයක නායකයෝ, ජනාධිපති අනුර කුමාර දිසානායක මහතා සහ ශ්‍රී ලංකාවේ ඉන්දීය මහකොමසාරිස් සන්තෝෂ් ජා මහතා හමුවී සාකච්ඡා පවත්වා තිබේ.
ශ්‍රී ලංකා දෙමළ පක්ෂ සහ මුස්ලිම් පක්ෂ නියෝජනය කරමින් ඉලංකයි තමිල් අරසු කච්චි (ITAK), ප්‍රජාතන්ත්‍රවාදී දෙමළ ජාතික සන්ධානය (DTNA), ලංකා කම්කරු කොංග්‍රසය (CWC), දෙමළ ප්‍රගතිශීලී සන්ධානය (TPA), ශ්‍රී ලංකා මුස්ලිම් කොංග්‍රසය (SLMC) සහ සමස්ත ලංකා මහජන කොංග්‍රසය (ACMC) යන පක්ෂවල නායකයෝ පසුගිය සඳුදා (03) ජනාධිපතිවරයා හමුවී පැය දෙකකට ආසන්න කාලයක් සාකච්ඡා කළහ.
උපරිම බලය බෙදීමක් සහිත නව ආණ්ඩුක්‍රම ව්‍යවස්ථාවක් සකස් කිරීම, පළාත් සභා මැතිවරණය කඩිනමින් පැවැත්වීම සහ සියලු ප්‍රජාවන්ට බලපාන ඉඩම් ගැටලු සඳහා සාධාරණ හා ස්ථිර විසඳුමක් ලබා දීම යන ප්‍රධාන ඉල්ලීම් තුන මෙහිදී ඉදිරිපත් කර ඇත.
නව ව්‍යවස්ථාවක් ගෙන ඒමේ ක්‍රියාවලිය ඉක්මනින් ආරම්භ වන බවත්, මැතිවරණ ක්‍රමය පිළිබඳව සොයා බලන පාර්ලිමේන්තු තේරීම් කාරක සභාවේ තීරණය ලැබුණු පසු පළාත් සභා මැතිවරණය පැවැත්වීමට පියවර ගන්නා බවත් ජනාධිපතිවරයා මෙහිදී සඳහන් කර තිබේ.
ජනාධිපති හමුවීමෙන් අනතුරුව, එම පක්ෂවල නායකයෝ ඉන්දීය මහකොමසාරිස් සන්තෝෂ් ජා මහතා ද හමුවී සාකච්ඡා කළ අතර, එහිදී පළාත් සභා ක්‍රමය ආරක්ෂා කර ගනිමින් සහ ඉන්දීය අපේක්ෂාවන් ද සැලකිල්ලට ගනිමින් ඉදිරි කටයුතු සිදු කිරීමේ වැදගත්කම පිළිබඳව සාකච්ඡා කර ඇත.
