ශ්‍රී ලංකාවේ නාගරික මහජන ප්‍රවාහන සේවය මෙට්‍රෝ ප්‍රමිතියට උසස් කිරීම සඳහා රජය පුළුල් වැඩපිළිවෙළක් ක්‍රියාත්මක කරමින් පවතින අතර, ඒ යටතේ අඩු මහල් (low-floor) ප්‍රමුඛතා බස් රථ සේවය පුළුල් කිරීමට කැබිනට් අනුමැතිය හිමි වී තිබේ.
ආබාධ සහිත පුද්ගලයන්ට ප්‍රවේශ වීමේ පහසුකම් සැලසීමේ විශේෂ අරමුණින් යුතුව, රුපියල් මිලියන 430.7ක ආයෝජනයකින් පසුගිය අප්‍රේල් 21 වැනි දින මෙම මෙට්‍රෝ අඩු මහල් බස් සේවය ආරම්භ කරන ලදී.
පළමු අදියර යටතේ වායු සමීකරණය කරන ලද බස් රථ 10ක් යොදවා ඇති අතර, ජූලි මාසයේදී අතිරේක මෙට්‍රෝ බස් රථ 104ක් එකතු වීමත් සමඟ වැඩසටහන පුළුල් කෙරිණි. මහජන ප්‍රවාහන පද්ධතිී නවීකරණ වැඩසටහන යටතේ තවත් අඩු මහල් බස් රථ 50ක් මිලදී ගැනීමට කැබිනට් අනුමැතිය ලැබී ඇත.
මෙම මෙට්‍රෝ සේවාව මඟින් පුද්ගලික අංශය සමඟ තරඟ කිරීමේ කිසිදු අදහසක් නොමැති බවත්, අනාගත ආයෝජන සහ සේවා හවුල්කාරිත්වයන් හරහා මෙම රාමුව තුළට පුද්ගලික ක්‍රියාකරුවන්ට ද දායක වීමට අවස්ථා ලබා දීම කෙරෙහි සාකච්ඡා කරමින් පවතින බව ලංකා මෙට්‍රෝ ට්‍රාන්සිට් සභාපති යු.පී. තිලකරත්න මහතා පවසයි.
ඩිජිටල්කරණ ප්‍රයත්න යටතේ මෙට්‍රෝ යෙදුම බාගත කිරීම් 100,000කට වැඩි සංඛ්‍යාවක් වාර්තා වී ඇති අතර, බැංකු කාඩ්පත්, QR කේත හෝ මෙට්‍රෝ ඩිජිටල් පසුම්බිය භාවිතයෙන් ගාස්තු ගෙවීමේ ස්වයංක්‍රීය ක්‍රමවේද (tap-in සහ tap-out) මෙන්ම තත්‍ය කාලීන බස් රථ ලුහුබැඳීමේ පහසුකම් ද ඊට ඇතුළත් වේ.
අනාගතයේදී දුම්රිය ප්‍රවේශපත්‍ර වෙන්කරවා ගැනීම්, මහාමාර්ග ගාස්තු ගෙවීම් සහ ස්මාර්ට් රථගාල් පහසුකම් ඇතුළු බහු ප්‍රවාහන සේවා එකම වේදිකාවකට ගෙන එන ‘ප්‍රවාහන සුපිරි යෙදුමක්’ (transport super app) හඳුන්වා දීමට නියමිතය.
පසුගිය දශක කිහිපය තුළ සියයට 80ක් පමණ වූ ශ්‍රී ලංකාවේ මහජන ප්‍රවාහන භාවිතය මේ වන විට සියයට 35ක් දක්වා පහත වැටී ඇති බව කොළඹ විශ්වවිද්‍යාලයේ ආර්ථික විද්‍යා අංශයේ මහාචාර්ය ලලිත්සිරි ගුණරුවන් පෙන්වා දෙන අතර, ඉන්ධන පරිභෝජනය අඩු කිරීමට, විදේශ විනිමය පීඩනය අවම කිරීමට සහ පරිසර දූෂණය පාලනය කිරීමට විශාල ධාරිතාවකින් යුත් මහජන ප්‍රවාහන සහ දුම්රිය සේවා කේන්ද්‍ර කරගත් ජාතික ප්‍රතිපත්තියක අවශ්‍යතාව අවධාරණය කර ඇත.
