කොළඹ නගරයට ප්රවේශවන ප්රධාන මාර්ගයක් වන ඔරුගොඩවත්ත – අඹතලේ මහාමාර්ගයේ උදෑසන සහ සවස් කාලයේ පවතින අධික රථවාහන තදබදයට විසඳුම් ලෙස මෙම මාර්ගය සහ එහි පාලම් පුළුල් කර සංවර්ධනය කිරීමේ කටයුතු ආරම්භ කර තිබේ.
මෙම ව්යාපෘතිය යටතේ ආරම්භ කර ඇති ප්රධාන පාලම් තුනක ඉදිකිරීම් කටයුතු මේ වනවිට කඩිනමින් සිදුකෙරමින් පවතී. කලු පාලම (අංක 2/3) සහ අංක 9/1 පාලම 2025 වසරේ ජනවාරි මස 23 වන දින සංවර්ධන කටයුතු ආරම්භ කරන ලද අතර, 2026 වසර අවසන් වීමට පෙර මේවා නිම කිරීමට සැලසුම් කර ඇත. අංක 4/1 පාලම 2026 වසරේ පෙබරවාරි මස 26 වන දින සංවර්ධන කටයුතු ආරම්භ කරන ලද අතර, 2027 වසරේ මැයි මාසයේදී එය අවසන් කිරීමට නියමිතය.
ජාත්යන්තර සංවර්ධනය සඳහා වන ඔපෙක් අරමුදල (OFID) සහ ජාත්යන්තර සංවර්ධනය සඳහා වන සෞදි අරමුදල (SFD) මෙම ව්යාපෘති සඳහා මූල්යාධාර සපයන අතර, පාලම් ත්රිත්වය වෙනුවෙන් වැයවන මුදල රුපියල් මිලියන 1,546 කි.
මෙම සැලසුම්ගත ක්රමවේදය හරහා ඔරුගොඩවත්ත, වැල්ලම්පිටිය, කොටිකාවත්ත, අංගොඩ, ගල්වාන සහ අඹතලේ යන ප්රධාන මංසන්දිවල පැවති අධික රථවාහන තදබදය අවම වී ජනතාවට අවම කාලයකින් ගමනාන්තයන් කරා ළඟාවීමට අවස්ථාව සැලසේ.
ප්රවාහන, මහාමාර්ග සහ නාගරික සංවර්ධන අමාත්යාංශයේ මෙහෙයවීමෙන් සහ මාර්ග සංවර්ධන අධිකාරියේ සේවා යෝජකත්වයෙන් ක්රියාත්මක මෙම ව්යාපෘතියේ ඉදිකිරීම් ELS ඉදිකිරීම් සමාගම මගින් සිදුකරනු ලබයි. කිලෝමීටර් 7.7 ක දිගකින් යුත් මෙම මාර්ගයේ පාලම් 08 ක් සංවර්ධනය කිරීම ආරම්භ කර ඇති අතර, ඉන් පාලම් පහක කටයුතු මේ වනවිට අවසන් කර ඇත. පාලම් අටෙහිම ඉදිකිරීම් සඳහා රුපියල් බිලියන 2.5 ක මූල්ය පිරිවැයක් දරා ඇති අතර, පාලම් ව්යාපෘතියට සමගාමීව මහාමාර්ගය කාපට් අතුරා සංවර්ධනය කිරීම සඳහා රුපියල් බිලියන 4.2 ක මුදලක් වැයකෙරෙන බව මාර්ග සංවර්ධන අධිකාරියේ විවිධ විදේශ ආධාර ව්යාපෘති අංශයේ ව්යාපෘති අධ්යක්ෂ අයි. කේ. බද්දේගම මහතා පැවසීය.
