“දිවියට සුවයක් දහමට සවියක්” යන තේමාව පෙරදැරි කරගනිමින්, බදුල්ල දිස්ත්‍රික්කයේ මහා සංඝරත්නය ඇතුළු සියලු ආගමික පූජ්‍ය පක්ෂය වෙනුවෙන් විශේෂ වෛද්‍ය සායනයක් 2026 අගෝස්තු 22 වන සෙනසුරාදා බදුල්ල මුතියංගන රජමහා විහාරස්ථානයේදී පැවැත්වීමට කටයුතු යොදා ඇත.
මහා සංඝරත්නය ප්‍රමුඛ සියලු ආගමික පූජ්‍ය පක්ෂයේ කායික හා මානසික සුවතාවය තහවුරු කිරීමේ මූලික අරමුණින් මෙම වැඩසටහන සංවිධානය කරනු ලබයි. බුද්ධ ශාසන, ආගමික හා සංස්කෘතික කටයුතු අමාත්‍යාංශය, බදුල්ල ශාසනාරක්ෂක බලමණ්ඩලය, බදුල්ල දිස්ත්‍රික් ජාතික භික්ෂු පෙරමුණ, ඌව පළාත් සභාව සහ බදුල්ල දිස්ත්‍රික් ලේකම් කාර්යාලය ඒකාබද්ධව මෙම සායනය සංවිධානය කරනු ලබන අතර, ඊට අදාළ මූලික සාකච්ඡාවක් ඌව පළාත් සභා ප්‍රධාන ලේකම් කාර්යාල රැස්වීම් ශාලාවේදී පවත්වන ලදී.
මෙම සාකච්ඡාව සඳහා බදුල්ල දිස්ත්‍රික් ජාතික භික්ෂු පෙරමුණේ සභාපති ශාස්ත්‍රපති දෙහිවින්නේ ගුණානන්ද හිමි, තරුණ කටයුතු නියෝජ්‍ය අමාත්‍ය දිනිඳු සමන් හෙන්නායක, බදුල්ල දිස්ත්‍රික් ලේකම් සුනිල් ගලගම ඇතුළු පළාත් සභාවේ, දිස්ත්‍රික් ලේකම් කාර්යාලයේ සහ ප්‍රාදේශීය සෞඛ්‍ය සේවා අධ්‍යක්ෂ කාර්යාලයේ නිලධාරීහු පිරිසක් සහභාගී වූහ.
