එල් නිනෝ (El Niño) තත්ත්වය ඇතුළු දේශගුණික විපර්යාස හමුවේ ශ්රී ලංකාවේ දේශගුණික ඔරොත්තු දීමේ හැකියාව ශක්තිමත් කිරීම සඳහා ප්රතික්රියාශීලී අර්බුද කළමනාකරණයෙන් ඔබ්බට ගොස් පූර්ව සූදානම් පාලන ක්රමවේදයක් (Anticipatory Crisis Governance) ස්ථාපිත කළ යුතු බව ශ්රී ලංකා දේශගුණය පිළිබඳ පාර්ලිමේන්තු සංසදයේදී අවධාරණය කර තිබේ.
විරුද්ධ පාර්ශ්වයේ නායක පාර්ලිමේන්තු මන්ත්රී සජිත් ප්රේමදාස සහ පාර්ලිමේන්තු මන්ත්රී මහාචාර්ය එල්.එම්. අබේවික්රම යන මහත්වරුන්ගේ සම සභාපතිත්වයෙන් පාර්ලිමේන්තුවේදී පැවති මෙම රැස්වීමේදී දේශගුණික විපර්යාස, කෘෂිකර්මාන්තය, ජල කළමනාකරණය, වනජීවී සංරක්ෂණය, අලි-මිනිස් ගැටුම සහ ආපදා කළමනාකරණය ඇතුළු කරුණු රැසක් සාකච්ඡා කර ඇත. මෙහිදී බටහිර ඕස්ට්රේලියා විශ්වවිද්යාලයේ මහාචාර්ය චරිත පට්ටිආරච්චී, අලි-මිනිස් ගැටුම පිළිබඳ අනුකමිටුවේ සභාපති ආචාර්ය සුමිත් පිලපිටිය සහ එල් නිනෝ ඔරොත්තු දීමේ ස්වාධීන විශේෂඥ උපදේශක කණ්ඩායමේ සභාපති මහාචාර්ය සම්පත් සෙනෙවිරත්න යන මහත්වරුන් විසින් විශේෂඥ කරුණු සහ අන්තර්වාර වාර්තා ඉදිරිපත් කරමින් විද්යාත්මක දත්ත මත පදනම් වූ ප්රතිපත්ති සම්පාදනයේ සහ කල්තියා සූදානම් වීමේ වැදගත්කම පෙන්වා දී ඇත.
