පවතින වියළි කාලගුණික තත්ත්වය සහ පාසල් නිවාඩු සමයත් සමඟ දරුවන් අතර සරුංගල් යැවීම ජනප්රිය විනෝදාංශයක් බවට පත්ව ඇති මුත්, නොසැලකිලිමත්කම සහ ආරක්ෂිත ක්රමවේදවලින් බැහැරව කටයුතු කිරීම හේතුවෙන් දරුවන්ට බරපතළ ජීවිත අවදානම් සහ අනතුරු රැසකට මුහුණ දීමට සිදුව ඇති බව රිජ්වේ ආර්යා ළමා රෝහල දැඩි ලෙස අනතුරු අඟවා සිටියි. කණ්ඩායම් වශයෙන් සරුංගල් යැවීමේදී සිදුවන ගැටීම් සහ වැටීම් මෙන්ම, උස් ස්ථානවලට නැඟ සරුංගල් යැවීමට උත්සාහ කිරීමේදී සිදුවන අනපේක්ෂිත ඇදවැටීම් හේතුවෙන් බරපතළ තුවාල ලැබූ දරුවන් රෝහල්ගත කිරීමේ ප්රවණතාවක් දක්නට ලැබෙන බව රෝහල් අධ්යක්ෂ, විශේෂඥ වෛද්ය ප්රදීප් රත්නසේකර මහතා නිකුත් කළ විශේෂ නිවේදනයක සඳහන් වේ.
විශේෂයෙන්ම සරුංගල් යැවීමේදී භාවිත කරන නූල් අධිබලැති විදුලි රැහැන්වල ගැටීම නිසා හටගන්නා විදුලි ධාරා සම්ප්රේෂණයෙන් දරුවන්ට දරුණු විදුලි සැර වැදීම් වාර්තා වන අතර, එමඟින් අත්, බාහු සහ පපු ප්රදේශවල ශරීර පටක, රුධිර වාහිනී මෙන්ම ස්නායු පද්ධතිය දැඩි ලෙස විනාශ වී ශල්යකර්ම මගින් ශරීරාංග ඉවත් කිරීමට පවා සිදුවන අතිශය ඛේදනීය තත්ත්වයන් මතුව තිබේ. අධිබලැති විදුලි රැහැන් හරහා ක්ෂණිකව සිදුවන මෙම විදුලි සැර වැදීම් ජීවිතක්ෂයට පත්වීමකින් කෙළවර වීමේ දැඩි අවදානමක් පවතින බැවින්, දෙමාපියන් සහ වැඩිහිටියන් තම දරුවන්ගේ ආරක්ෂාව සම්බන්ධයෙන් අතිශයින් විමසිලිමත් විය යුතු කාලයක් උදා වී ඇත.
දරුවන්ගේ විනෝදාස්වාදය මෙන්ම ඔවුන්ගේ ජීවිත ආරක්ෂාවද එකසේ වැදගත් වන හෙයින්, අධිබලැති විදුලි රැහැන් පවතින ප්රදේශවලින් දරුවන් ඈත් කර තැබීමට සහ සරුංගල් යැවීමේ ක්රියාකාරකම් දැඩි අධීක්ෂණයකට යටත් කිරීමට පවුල් මට්ටමින් සහ සමාජීය වශයෙන් වගකීමෙන් යුතුව කටයුතු කිරීම අත්යවශ්ය වේ. ඉදිරියේදී මෙවැනි අනතුරු අවම කර ගැනීම සඳහා දෙමාපියන්ගේ සහ ප්රජාවගේ දැනුවත්භාවය ඉහළ නැංවීම මෙන්ම, අනතුරුදායක ප්රදේශවල ආරක්ෂිත පියවර අනුගමනය කිරීම හරහා දරුවන්ගේ අනාගතය සුරක්ෂිත කිරීමට පුළුල් සමාජ මැදිහත්වීමක් අවශ්ය වනු ඇත.
