පලෙයි කැලය තුළ එල්.ටී.ටී.ඊ. ත්රස්තවාදී කඳවුරක් පවතින බවට සමාජ මාධ්යයේ හුවමාරු වන සටහන් සම්පූර්ණයෙන් අසත්ය බව කැබිනට් ප්රකාශක අමාත්ය වෛද්ය නලින්ද ජයතිස්ස මහතා පවසයි.
අද (18) පැවති කැබිනට් තීරණ දැනුම්දීමේ මාධ්ය හමුවේදී යොමු කළ පැනයකට පිළිතුරු ලබා දෙමින් අමාත්යවරයා සඳහන් කළේ, සිදුව ඇත්තේ අදාළ රක්ෂිතයේ කොටසක් පුද්ගලයෙකු විසින් අනවසරයෙන් එළිපෙහෙළි කර ගොඩනැගිල්ලක් ඉදිකර ඒ තුළ ප්රදේශයේ ජනතාවගේ සහභාගීත්වයෙන් ඇඟලුම් කර්මාන්ත ශාලාවක් පවත්වාගෙන යාම බවයි. මෙම අනවසර කැලෑ හෙළි කිරීම් සහ ඉදිකිරීම් සම්බන්ධයෙන් අදාළ අයිතිකරුට එරෙහිව මේ වන විට නඩු 7ක් පවරා ඇති බවද හෙතෙම අනාවරණය කළේය.
කිලිනොච්චි දිස්ත්රික්කයේ අක්කරායන්පුලම් පොලිස් වසමට අයත් මුක්කන්පන් ප්රදේශයේ පිහිටා ඇති මෙම රක්ෂිතය තුළ 2025 වසරේ සිට සිදුවූ නීතිවිරෝධී කැලෑ කැපීම් සහ ගොඩනැගිලි ඉදිකිරීම් සම්බන්ධයෙන් අඩවි වන කාර්යාලය සහ පොලීසිය විසින් නිරන්තරයෙන් වැටලීම් සිදුකර ඇත. අදාළ ඉඩම් හිමියාට එරෙහිව අධිකරණ නියෝග ලබා ගැනීම්, රාජකාරියට බාධා කිරීම් සම්බන්ධයෙන් පුද්ගලයින් අත්අඩංගුවට ගැනීම් සහ නීතිමය ක්රියාමාර්ග අඛණ්ඩව ක්රියාත්මක කර තිබේ.
මෙම ස්ථානයේ වගාවක් සහ මැෂින් කිහිපයක් සහිත ඇඟලුම් නිෂ්පාදන ආයතනයක් පවතින බවට තොරතුරු ලැබී ඇති නමුත්, එහි කිසිදු ත්රස්තවාදී කඳවුරක් නොමැති බව අමාත්යවරයා අවධාරණය කළේය. එබැවින්, මෙවැනි සාවද්ය සහ ප්රචාරක අරමුණු සහිත අසත්ය ප්රවෘත්ති පතුරුවන පුද්ගලයන්ට එරෙහිව දැඩි නීතිමය ක්රියාමාර්ග ගන්නා බවද ඔහු වැඩිදුරටත් කියා සිටියේය.
