MAS සමූහය සහ බ්රැන්ඩික්ස් ලංකා (Brandix Lanka) හි පූර්ණ මූල්ය දායකත්වයෙන්, කොළඹ රාජකීය විද්යාලය පරිපූර්ණ ස්මාර්ට් පාසලක් බවට පත් කිරීමේ සුවිසල් ව්යාපෘතියක් නිල වශයෙන් ආරම්භ කර තිබේ.
රුපියල් මිලියන 180ක දැවැන්ත ආයෝජනයක් ලෙස ක්රියාත්මක මෙම ව්යාපෘතියේ මූලික අරමුණ වන්නේ සිසුන් වෙනුවෙන් වඩාත් අන්තර්ක්රියාකාරී, පහසුවෙන් ප්රවේශ විය හැකි සහ අනාගතයට ගැළපෙන ඉගෙනුම් පරිසරයක් නිර්මාණය කිරීමයි. මෙම ව්යාපෘතිය යටතේ ස්මාර්ට් පන්ති කාමර 141ක් ස්ථාපිත කිරීමට නියමිත අතර, එය ෆයිබර් ඔප්ටික් ජාලයක්, ඒකාබද්ධ ඉගෙනුම් පද්ධතියක් සහ පාසල් කළමනාකරණ පද්ධතියක් සමඟ සම්බන්ධ කෙරේ.
මීට අමතරව, අධිවේගී සබඳතා, ක්ලවුඩ් (Cloud) යටිතල පහසුකම්, ගුරු පුහුණු මධ්යස්ථානයක් සහ ඩිජිටල් අධ්යාපනික වීඩියෝ නිර්මාණ සිදු කළ හැකි ස්ටුඩියෝ පහසුකම් ද මෙහි මූලික අංග වේ. රාජකීය විද්යාලයේ ආදි සිසුන් වන MAS සමූහයේ සභාපති දේශමාන්ය මහේෂ් අමලියන් සහ බ්රැන්ඩික්ස් ලංකා සමාගමේ සමූහ ප්රධාන විධායක නිලධාරී අෂ්රොෆ් ඕමාර් යන මහත්වරුන්ගේ සුවිශේෂී මූල්ය දායකත්වයෙන් මෙම ව්යාපෘතිය ක්රියාවට නංවා ඇත.
මෙමඟින් කොළඹ රාජකීය විද්යාලයේ සජීවීව පැවැත්වෙන පන්ති කාමර දේශන, දිවයිනේ අනෙකුත් ප්රදේශවල පිහිටි ආරාධිත පාසල්වල සිසුන්ටද සජීවීව සම්බන්ධ වී ඉගෙන ගැනීමට අවස්ථාව සලසා දෙන අතර, අනාගතයේදී මෙම තාක්ෂණික ආකෘතිය ශ්රී ලංකාව පුරා අනෙකුත් පාසල් වෙතද ව්යාප්ත කිරීමට අපේක්ෂා කෙරේ.
