දිළිඳුකම පිටුදැකීම, සමාජ සවිබලගැන්වීම සහ ආර්ථික සාධාරණත්වය තහවුරු කිරීම අරමුණු කරගනිමින් රජය ක්රියාත්මක කරන ප්රධානතම ජාතික මෙහෙයුම වන “ප්රජාශක්ති” වැඩසටහනේ 2026 වසරේ ප්රගතිය සමාලෝචනය කිරීම සහ 2027 වසරේ ඉදිරි සැලසුම් තීරණය කිරීම පිළිබඳ විශේෂ සාකච්ඡාවක් ඊයේ (24) ජනාධිපති කාර්යාලයේදී පැවැත්විණි. ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීමේ අමාත්ය ආචාර්ය උපාලි පන්නිලගේ සහ ජනාධිපති ලේකම් ආචාර්ය නන්දික සනත් කුමානායක යන මහත්වරුන්ගේ ප්රධානත්වයෙන් පැවැති මෙම සාකච්ඡාවේදී අනාවරණය වූයේ, 2026 අයවැයෙන් වෙන් කළ රුපියල් බිලියන 25ක ප්රතිපාදන අතුරින් බිලියන 23ක් යොදවමින් ආරම්භ කළ ව්යාපෘති 23,000ම මෙලෙස සාර්ථකව අවසන් කිරීමේ හැකියාව පවතින බවයි.
ග්රාමීය මට්ටමින් ආර්ථික සාධාරණත්වය ඉටු කිරීමේ සුවිශේෂී පියවරක් ලෙස, තවත් රුපියල් මිලියන 2,000ක මුදලක් විශේෂ ආකෘතික ව්යාපෘති (Model Projects) සහ ව්යවසාය සංවර්ධන වැඩසටහන් සඳහා වෙන් කර ඇති අතර, එමගින් හඳුනාගන්නා අලුත්ම ව්යාපෘති ඉදිරියේදී සමස්ත ප්රජාශක්ති සැකිල්ල යටතේ ක්රියාත්මක කිරීමට නියමිතය. සමස්ත පරිපාලන ව්යූහය ශක්තිමත් කරමින් ප්රජා සංවර්ධන සභා සඳහා නිලධාරීන් පත් කර අවසන් කර ඇති අතර, ජන හා සංඛ්යා ලේඛන දෙපාර්තමේන්තුවේ දත්ත රැස්කිරීමේ ක්රියාවලියට ඔවුන්ගේ සහාය ලබාදීමේදී ග්රාමීය මට්ටමේ නිලධාරීන් අතර කිසිදු ගැටුමක් ඇති නොවීමට කටයුතු සම්පාදනය කර ඇත. මීට අමතරව ක්ෂුද්ර පරිමාණ ව්යවසාය සංවර්ධනය, ධාරිතා සංවර්ධන පුහුණු මොඩියුල, මාර්ගෝපදේශ සංග්රහ හා ප්රජා දත්ත අත්පොත මුද්රණය මෙන්ම තුන් අවුරුදු උපායමාර්ගික සැලැස්ම සක්රීය කිරීමටද මෙහිදී අවසාන එකඟතාව පළ විය.
මෙම ජාතික සංවර්ධන වැඩපිළිවෙළේ තාක්ෂණික හා උපායමාර්ගික හැරවුම් ලක්ෂ්යය ලෙස ප්රජාශක්ති ජාතික දත්ත හා තොරතුරු පද්ධතිය සැකසීම සම්පූර්ණයෙන්ම අවසන් කර ඇති අතර, ඊට තොරතුරු ඇතුළත් කිරීමට ප්රාදේශීය ලේකම් කාර්යාල සහ ප්රජා සංවර්ධන සභා නිලධාරීන් වහා යොමු කරවන ලෙස අමාත්යවරයා උපදෙස් ලබා දී තිබේ. ඒ අනුව එළඹෙන 2027 වසරේ ග්රාමීය සංවර්ධන සැලැස්ම (VDP) පූර්ණ ඩිජිටල්කරණය වූ මෙම දත්ත පද්ධතිය හරහාම සකස් කිරීමට නියමිත අතර, එහි සමාරම්භක වැඩසටහන එළඹෙන සැප්තැම්බර් 2 සහ 3 යන දෙදින තුළ පුත්තලම දිස්ත්රික්කයෙන් ආරම්භ කරන බව ජනාධිපති ජ්යේෂ්ඨ අතිරේක ලේකම් කපිල ජනක බණ්ඩාර මහතා තහවුරු කළේය.
