හිටපු ජනාධිපති රනිල් වික්‍රමසිංහ මහතා ඇතුළු පවුලේ සාමාජිකයන් සතුව තිබූ ‘වර්ණ ලිමිටඩ්’ සමාගමේ කොටස් සහ අධ්‍යක්ෂ ධුරවලින් ඔවුන් සම්පූර්ණයෙන් ඉවත් වී එම සමාගම දයා ගමගේ පවුල වෙත පවරා දී ඇති බවට සිවිල් බුද්ධි පෙරමුණ විසින් සිදු කර ඇති බරපතල හෙළිදරව්ව දේශපාලන ක්ෂේත්‍රයේ දැඩි ආන්දෝලනයක් මතු කර තිබේ. කොළඹදී පැවති විශේෂ මාධ්‍ය හමුවක් අමතමින් එම සංවිධානයේ සභාපති සංජය මහවත්ත මහතා පෙන්වා දුන්නේ, පසුගිය ඔක්තෝබර් 14 වන දින නිකුත් කරන ලද ලේඛනවලට අනුව රනිල් වික්‍රමසිංහ මහතා අදාළ සමාගමේ වැඩිම කොටස් හිමි තනි පුද්ගලයා ලෙස නම් කර තිබූ පසුබිමක, මෙම හදිසි හිමිකාරීත්ව මාරුවීම පිටුපස සැකසංකා මතු වන මූල්‍යමය පසුබිමක් ඇති බවයි. රජයේ බැංකු මඟින් මෙම සමාගම වෙත බිලියන ගණනක ණය මුදල් ලබා දී ඇති බවට වාර්තා වන අතර, වික්‍රමසිංහ පවුල සමාගමෙන් ඉවත් වීමට ප්‍රථම එම මූල්‍ය ණය සම්පූර්ණයෙන් පියවා තිබේද යන්න පිළිබඳව මේ වන විට බරපතල ප්‍රශ්නාර්ථයක් මතුවී තිබේ.
මෙම ව්‍යාපාරික හිමිකාරීත්ව මාරුව සහ රජයේ බැංකු ණය අතර පවතින සබඳතාව මෙරට මූල්‍ය පද්ධතියට සහ මහජන තැන්පත්කරුවන්ට සෘජුව බලපාන බරපතල ගැටළුවක් බවට පත්ව ඇතැයි විචාරකයින් පෙන්වා දෙති. නව අධ්‍යක්ෂ මණ්ඩලය ලෙස අශෝක හේමචන්ද්‍ර සහ දයා ගමගේ මහතාගේ පුත් චමීන්ද්‍ර කිලිටුව ගමගේ යන අය පත් කර තිබීම හරහා මෙය සංවිධානාත්මක මූල්‍ය උපායමාර්ගයක කොටසක් විය හැකි බවට සිවිල් බුද්ධි පෙරමුණ බරපතල චෝදනා එල්ල කරයි. අදාළ රාජ්‍ය බැංකු ණය මුදල් ඉදිරියේදී බොල් ණය ලෙස කපා හැරීමේ අවදානමක් පවතින බවත්, එමඟින් මෙරට පොදු මහජනතාවගේ සහ තැන්පත්කරුවන්ගේ අරමුදල් අවභාවිත වීමේ බරපතල අවදානමක් මතුවිය හැකි බවත් මෙහිදී අවධාරණ කෙරිණි. දේශපාලන බලපෑම් මත සිදුවිය හැකි යැයි සැක කෙරෙන මෙවැනි මූල්‍ය අක්‍රමිකතා රටේ ආර්ථික ස්ථාවරත්වයට මෙන්ම විනිවිදභාවයට එල්ල වන දැඩි අභියෝගයකි.
