ව්යවස්ථාමය ප්රජාතන්ත්රවාදය, බලතල බෙදීම, අධිකරණ ස්වාධීනත්වය සහ නීතියේ ආධිපත්යය යන මූලධර්ම මත පදනම් වූ දූරදර්ශී දැක්මක් සහිත ජාතික සංවාදයක් අවශ්ය බව විපක්ෂ නායක සජිත් ප්රේමදාස අවධාරණය කරයි. කුමන දේශපාලන පක්ෂයක් බලයේ සිටියද ව්යවස්ථාමය ආයතන විශ්වාසනීයව සහ ස්වාධීනව ක්රියා කළ හැකි වන පරිදි ආයතනික ව්යුහයන් සැලසුම් කළ යුතු බව ඔහු පෙන්වා දී තිබේ.
කොළඹ පිහිටි විපක්ෂ නායක කාර්යාලයේදී පොදුරාජ්ය මණ්ඩලීය නීතිඥ සංගමයේ සභාපති ස්ටීවන් තිරු සමඟ පැවති හමුවකින් අනතුරුව අදහස් දක්වමින් විපක්ෂ නායකවරයා මේ බව සඳහන් කළේය. ව්යවස්ථා ප්රතිසංස්කරණ වත්මන් ආණ්ඩුවේ හෝ විපක්ෂයේ දේශපාලන අවශ්යතා මත නොව, දේශපාලන බලය වෙනස් වූ අවස්ථාවක පවා ජනතාවට සහ ආයතනවලට ආරක්ෂිත මෙන්ම පිළිගත හැකි වන ආකාරයෙන් සැලසුම් කළ යුතු බව ඔහු පෙන්වා දුන්නේය. එසේම, වර්තමාන කිසිදු අධිකරණ කටයුත්තකට බලපෑම් කිරීමකින් තොරව විශේෂිත ව්යවස්ථා අධිකරණයක් හෝ වෙනත් සමාලෝචන යාන්ත්රණයක් ශ්රී ලංකාවට අවශ්යද යන්න සලකා බැලිය හැකි බවත්, 2024 ජනාධිපතිවරණයේදී ඉදිරිපත් කළ ‘Environmental Charter 2.0’ හි 14 වැනි කොටස යටතේ විශේෂිත පාරිසරික අධිකරණයක් හෝ විනිශ්චය සභාවක් පිහිටුවීම සඳහා වන ප්රතිපත්තිමය කැපවීම පිළිබඳව ද අවධානය යොමු කළ බව ඔහු වැඩිදුරටත් සඳහන් කළේය.
