බිම්ස්ටෙක් කලාපීය සහයෝගීතාවය යටතේ තාක්ෂණ හුවමාරුව ශක්තිමත් කිරීම සඳහා බිම්ස්ටෙක් තාක්ෂණ පැවරුම් පහසුකමක් (BIMSTEC Technology Transfer Facility) ශ්රී ලංකාව තුළ ස්ථාපනය කිරීමට අදාළ අවබෝධතා ගිවිසුම පසුගිය 11 වනදා කොළඹදී අත්සන් කර තිබේ.
විද්යා හා තාක්ෂණ අමාත්යාංශය සඳහන් කළේ, බිම්ස්ටෙක් කලාපීය විද්යාව, තාක්ෂණය සහ නවෝත්පාදන සහයෝගීතාව පිළිබඳ විශේෂඥ කණ්ඩායමේ සිව්වන රැස්වීමට සමගාමීව මෙම ගිවිසුම අත්සන් කළ බවයි.
ශ්රී ලංකා රජය සහ බිම්ස්ටෙක් මහලේකම් කාර්යාලය අතර අත්සන් කළ ගිවිසුමට ශ්රී ලංකාව වෙනුවෙන් විද්යා හා තාක්ෂණ අමාත්යාංශයේ වැඩබලන ලේකම් මහේෂ් ගම්මන්පිල මහතාත්, බිම්ස්ටෙක් මහලේකම් කාර්යාලය වෙනුවෙන් එහි මහලේකම් ඉන්ද්රා මනි පාන්ඩේ මහතාත් අත්සන් තැබූහ.
මෙම තාක්ෂණ පැවරුම් පහසුකමේ ප්රධාන අරමුණ වන්නේ බිම්ස්ටෙක් සාමාජික රටවල් අතර තාක්ෂණ හුවමාරුව සම්බන්ධීකරණය කරමින් එය තවදුරටත් ශක්තිමත් කිරීමයි.
විශේෂයෙන්ම කලාපයේ ක්ෂුද්ර, කුඩා සහ මධ්ය පරිමාණ ව්යවසායන් සඳහා තාක්ෂණය ලබාදීම, ධාරිතා වර්ධනය සහ බුද්ධිමය දේපළ කළමනාකරණය ඇතුළු කටයුතු සඳහා මෙම පහසුකම ප්රමුඛත්වය ලබාදීමට නියමිතය.
මෙම අවස්ථාවට ශ්රී ලංකාවේ විදේශ කටයුතු, විදේශ රැකියා සහ සංචාරක අමාත්යාංශයේ ලේකම් අරුණි රණරාජ මහත්මිය ඇතුළු නිලධාරීන් මෙන්ම බිම්ස්ටෙක් මහලේකම් කාර්යාලයේ සහ විද්යා හා තාක්ෂණ අමාත්යාංශයේ නිලධාරීහු සහභාගී වූහ.
එමෙන්ම බංග්ලාදේශය, භූතානය, ඉන්දියාව, මියන්මාරය, නේපාලය සහ තායිලන්තය යන බිම්ස්ටෙක් සාමාජික රටවල් නියෝජනය කරමින් එම රටවල තානාපති කාර්යාලවල නිලධාරීන්ද මෙම අවස්ථාවට එක්ව සිටියහ.
