ලෝක වෙළෙඳපොළේ ඉන්ධන මිල ඉහළ යාම සහ මැදපෙරදිග පවතින වත්මන් තත්ත්වය සැලකිල්ලට ගනිමින් සැප්තැම්බර් මාසය අවසානයේදී ඉන්ධන මිල සංශෝධනයක් සිදුකිරීමට ඉඩ ඇති බව බලශක්ති අමාත්‍ය අනුර කරුණාතිලක මහතා පවසයි.
ඉන්ධන බෙදාහැරීමේ සමාගම්වල පවතින ඉන්ධන හිඟය සම්බන්ධයෙන් අද (14) මාධ්‍යවේදීන් කළ විමසීමකට පිළිතුරු ලබාදෙමින් අමාත්‍යවරයා මේ බව සඳහන් කළේය.
ජාත්‍යන්තර වෙළෙඳපොළේ ඉන්ධන මිල ඉහළ ගොස් තිබුණද, මෙරට ඉන්ධන අලෙවි කරනු ලබන්නේ ඊට සාපේක්ෂව අඩු මිලකට බවද අමාත්‍යවරයා පෙන්වා දුන්නේය.
පවතින තත්ත්වය හමුවේ තවදුරටත් කටයුතු කිරීම අභියෝගයක් බව පෞද්ගලික ඉන්ධන බෙදාහැරීමේ සමාගම් කිහිපයක් රජයට දැනුම් දී ඇති බවත්, එම සමාගම් නියෝජිතයන් සමඟ සාකච්ඡා කර ඉදිරියේදී සුදුසු තීරණයකට එළඹෙන බවත් ඔහු පැවසීය.
ඉන්ධන හිඟය සහ මිල ඉහළ යාම සම්බන්ධයෙන් විසඳුම් කිහිපයක් පිළිබඳව රජයේ අවධානය යොමුව ඇති බවද අමාත්‍යවරයා සඳහන් කළේය. ඒ අතර රජය මැදිහත් වී ඉන්ධන සහනාධාරයක් ලබාදීම හෝ ඉන්ධන මිල සම්බන්ධයෙන් යම් තීරණයකට එළඹීම වැනි ක්‍රමවේදද ඇතුළත් බව ඔහු පැවසීය.
පෞද්ගලික ඉන්ධන සමාගම් විසින් විවිධ යෝජනා ඉදිරිපත් කර ඇති නමුත්, පාරිභෝගික ජනතාව කෙරෙහිද අවධානය යොමු කර අවසන් තීරණය ගන්නා බව බලශක්ති අමාත්‍යවරයා වැඩිදුරටත් සඳහන් කළේය.
සෑම මසකම අවසානයේ ඉන්ධන මිල සංශෝධනය සිදුකරන ක්‍රමවේදයට අනුව, පවතින තත්ත්වයන් සහ සියලු පාර්ශ්වයන්ගේ කරුණු සලකා බලා මෙම මස අවසානයේදීද ඉදිරි පියවර ගන්නා බව අමාත්‍යවරයා අවධාරණය කළේය.
