නවදිල්ලි නුවර පැවැත්වෙන BRICS සමුළුවට සහභාගී වීම සඳහා ඉන්දියාවේ නිල සංචාරයක නිරතව සිටින දකුණු අප්‍රිකානු ජනාධිපති සිරිල්‌ ਰමපෝසා (Cyril Ramaphosa) මහතා, ජාත්‍යන්තර වෙළෙඳපොළ තුළ තෙවන පාර්ශ්වීය මුදල් ඒකක මත යැපීම අවම කිරීමේ අරමුණින්‌ දේශීය මුදල් භාවිතය ප්‍රවර්ධනය කිරීමේ වැඩසටහනක්‌ යටතේ අමෙරිකානු ඩොලර්වලින්‌ තොරව ඍජුවම දේශීය මුදල් හරහා ගනුදෙනු කිරීමේ ක්‍රමයක්‌ පුද්ගලිකව අත්හදා බලා තිබේ. ඉන්දීය අග්‍රාමාත්‍ය නරේන්ද්‍ර මෝදි මහතා හමුවූ අවස්ථාවේදී ජනාධිපතිවරයා මෙම අත්දැකීම බෙදාහදා ගත්‌ අතර, ඉන්දියාවේ සංචාරය කරන අතරතුර පොත්‌ කිහිපයක්‌ මිලදී ගැනීම සඳහා තමන්ගේ කාඩ්පත භාවිත කර ඉන්දීය රුපියල්වලින් ගෙවීම සිදු කළ බවත්‌, එය කිසිදු ගැටළුවකින්‌ තොරව ඍජුවම දකුණු අප්‍රිකානු රැන්ඩ්‌ (Rand) මුදල් ඒකකයට පරිවර්තනය වෙමින්‌ සාර්ථකව ක්‍රියාත්මක වූ බවත්‌ ප්‍රකාශ කළේය.
“මම අගමැති මෝදිතුමාට කිව්වා අපි දේශීය මුදල් හරහා කරන වෙළෙඳාම මම පෞද්ගලිකව අත්හදා බැලුවා කියලා. මම මෙහෙන්‌ පොත්‌ කිහිපයක්‌ අරන්‌ දේශීය මුදලින්‌ ගෙවීම්‌ කළා. මගේ කාඩ්පතෙන්‌ කළ ගෙවීම රුපියල්වලින් කැපී දකුණු අප්‍රිකානු රැන්ඩ්‌වලට පරිවර්තනය වුණා. මීට වඩා හොඳ ක්‍රමයක්‌ තියෙන්න බෑ” යැයි ਰමපෝසා මහතා උද්යෝගයෙන්‌ යුතුව සඳහන්‌ කළේය. BRICS සාමාජික රටවල් අතර දේශීය මුදල් භාවිතය පුළුල්‌ කිරීම සහ දේශසීමා අතර හරස්‌ ගෙවීම්‌ යාන්ත්‍රණයන්‌ (cross-border payment mechanisms) ශක්තිමත්‌ කිරීමේ අරමුණින්‌ ක්‍රියාත්මක කරන වැඩසටහන්‌ සමඟ මෙම සිදුවීම මනාව ගැළපෙන බව ආර්ථික විචාරකයෝ පෙන්වා දෙති.
නවදිල්ලි නුවර පැවැත්වෙන මෙම BRICS සමුළුව තුළ ආර්ථික සහයෝගීතාව, ද්විපාර්ශ්වික වෙළෙඳාම සහ ජාත්‍යන්තර මූල්‍ය පද්ධතියේ ප්‍රතිසංස්කරණ පිළිබඳව පුළුල්‌ ලෙස සාකච්ඡා කිරීමට නියමිත අතර, බ්‍රසීලය, රුසියාව, ඉන්දියාව, චීනය සහ දකුණු අප්‍රිකාව යන ආරම්භක සාමාජිකයන්ට අමතරව මෑතකදී මෙම සංවිධානයට තවත්‌ රටවල් කිහිපයක්‌ද එක්‌ වී තිබේ.
