පාස්කු ඉරිදා ත්රස්ත ප්රහාරය සම්බන්ධයෙන් සිදු කෙරෙන විමර්ශනවලදී, යුද හමුදා බුද්ධි අංශය විසින් එම ප්රහාරයට අදාළ තොරතුරු පූර්වයෙන් දැන සිටියද ඒවා සඟවා බලා සිට ඇති බවට අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිස්ටර් ජනරාල් දිලීප පිරිස් මහතා කොළඹ මහේස්ත්රාත් අධිකරණයේදී කරුණු අනාවරණය කළේය.
මෙම සිද්ධියට අදාළව හිටපු බුද්ධි අංශ නිලධාරියෙකු වන රංජන් සෙනරත් යන අයට විදෙස් ගමන් තහනමක් පැනවීමටද කොළඹ මහේස්ත්රාත් පසන් අමරසේන මහතා මෙහිදී නියෝග කළේය. එසේම, රැඳවුම් නියෝග මත රඳවා සිටින රාජ්ය බුද්ධි සේවයේ හිටපු ප්රධානී සුරේෂ් සලේගේ සෞඛ්ය තත්ත්වය සහ ඔහු ජාතික රෝහලේ නේවාසිකව ප්රතිකාර ලබාගත යුතුද යන්න පිළිබඳ වෛද්ය වාර්තා අධිකරණයට හා පංච පුද්ගල වෛද්ය මණ්ඩලයට ලබා නොදීම සම්බන්ධයෙන් සැප්තැම්බර් 22 වන දින අධිකරණයේ පෙනී සිට හේතු දක්වන ලෙස ජාතික රෝහලේ අධ්යක්ෂවරයාට නොතිසි නිකුත් කෙරිණි.
සැකකරු වෙනුවෙන් පෙනී සිටි ජනාධිපති නීතිඥ ශාවින්ද්ර ප්රනාන්දු සඳහන් කළේ බී වාර්තාවල සඳහන් වන කරුණු සාක්ෂි නොවන බවයි. මෙම නඩුව යළි සැප්තැම්බර් 22 වන දින කැඳවීමට නියමිතය.
