ශ්රී ලංකා ජාතික ශූරා සභාව (NSC) විසින් සෞදි අරාබියේ සල්මන් බින් අබ්දුල්අසීස් අල් සවුද් රජු වෙත විශේෂ ලිපියක් යොමු කරමින්, ශ්රී ලංකා ජාතික සිවරාස අනුජන් වෙත රාජකීය සමාවක් සලකා බලන ලෙස ඉල්ලා තිබේ. සැප්තැම්බර් 19 දිනැතිව යොමු කර ඇති මෙම ලිපියෙහි සඳහන් වන්නේ, මුහම්මද් නබිතුමාට අපහාස කිරීමේ චෝදනාව මත අනුජන්ට වසර පහක සිරදඬුවමක් සහ සෞදි රියාල් මිලියන තුනක දඩ මුදලක් නියම කර ඇති බවයි. සෞදි අධිකරණ බලධාරීන්ගේ තීන්දුව ප්රශ්න කිරීමකින් තොරව, මානුෂීය පදනම මත පමණක් මෙම ඉල්ලීම සිදු කරන බව ජාතික ශූරා සභාව අවධාරණය කර ඇත.
අනුජන් තම ක්රියාව පිළිබඳව කණගාටුව ප්රකාශ කරමින් සමාජ මාධ්ය හරහා ප්රසිද්ධියේ සමාව අයැද ඇති බවත්, මුස්ලිම්වරුන්ගේ ආගමික හැඟීම්වලට ගරු කරන බව ප්රකාශ කර ඇති බවත් එමඟින් පෙන්වා දී තිබේ. අඩු ආදායම්ලාභී සේවකයෙකු වීම, විශාල පවුලක් නඩත්තු කිරීම සහ පැනවූ දඩ මුදල ගෙවීමට ඇති ආර්ථික අපහසුතා මෙන්ම මෙම වසරේ විවාහ වීමට සූදානම්ව සිටි පසුබිමක් තුළ ඔහුගේ පවුල මුහුණ දී ඇති දුෂ්කරතා සභා මඟින් පෙන්වා දී ඇත. මෙම කාරණය සම්බන්ධයෙන් දැක්වෙන දයාව සහ අනුකම්පාව දෙරට අතර පවතින දිගුකාලීන සබඳතා තවදුරටත් ශක්තිමත් කිරීමට හේතු වනු ඇතැයිද ශූරා සභාව විශ්වාසය පළ කරයි.
