මැදපෙරදිග කලාපයේ උද්ගතව ඇති නොසන්සුන්කාරී වාතාවරණය හමුවේ ලෝක වෙළෙඳපොළේ ඉන්ධන මිල ඉහළ යාම පාලනය කිරීම සඳහා ඉදිරි මාස තුනට රුපියල් කෝටි 4,100ක මුදලක් වෙන් කිරීමට රජය ගෙන ඇති තීරණයත් සමඟ රටේ ආර්ථික ස්ථාවරත්වය පිළිබඳ බරපතල ගැටලුකාරී තත්ත්වයක් මතු වී තිබේ. ගෝලීය වෙළෙඳපොළ ප්‍රවණතා හමුවේ දේශීය ඉන්ධන මිල පාලනය කිරීමට මෙම අරමුදල් වෙන් කළද, ආර්ථික විශ්ලේෂකයන් පෙන්වා දෙන්නේ මින් ඉන්ධන පරිභෝජනය පාලනය වීම වෙනුවට තවදුරටත් ඉහළ යාමක් සිදු විය හැකි බවයි.
මෙම දැවැන්ත මූල්‍ය ප්‍රතිපාදනය සොයා ගැනීම සඳහා වෙනත් සංවර්ධන හෝ අත්‍යවශ්‍ය අංශවල අරමුදල් කප්පාදු කිරීමට සිදුවීම හරහා දේශීය ආර්ථිකයට බරපතල අහිතකර ප්‍රතිවිපාක එල්ල විය හැකි බව ආර්ථික විශ්ලේෂක ධනනාත් ප්‍රනාන්දු මහතා අවධාරණය කරයි. විශේෂයෙන්ම මෙවැනි සහනාධාර ක්‍රමයක් හරහා රුපියල තවදුරටත් අවප්‍රමාණය වීමේ දැඩි අවදානමක් මෙන්ම විදේශ සංචිත හිඟයකට මුහුණ දීමට සිදු වීමත් සමඟ, ජාත්‍යන්තර මූල්‍ය අරමුදල සමඟ ඇති කරගෙන තිබෙන එකඟතාවලට ද මෙය බරපතල අභියෝගයක් වනු ඇත.
සෑම ඉන්ධන ලීටරයකටම සහන ලබා දීමෙන් වැඩි වාසියක් ධනවත් පන්තියට හිමි වන බැවින්, රුපියල අවප්‍රමාණය වීමට ඉඩ හැරීම හෝ සංචිත වියදම් කිරීමට වඩා ලෝක වෙළෙඳපොළට අනුකූලව මිල සංශෝධනය කිරීම වඩාත් ප්‍රායෝගික බව විශේෂඥයෝ යෝජනා කරති. ඒ වෙනුවෙන් පොදු ප්‍රවාහනය සහ සැබෑ ලෙසම සහනාධාර අවශ්‍ය අඩු ආදායම්ලාභී ප්‍රජාව ඉලක්ක කරගත් සෘජු මූල්‍ය සහන ක්‍රමවේදයකට එළඹීම හරහා රජයේ අරමුදල් සුරක්ෂිත කරගනිමින් ජනතාවට සැබෑ ප්‍රතිලාභ ලබා දිය හැකි බවට ඔවුහු පෙන්වා දෙති.
