අදට (01) යෙදී ඇති ලෝක ළමා දිනය වෙනුවෙන් කාන්තා සහ ළමා කටයුතු අමාත්‍යාංශය විසින් ක්‍රියාත්මක කරන ලද ජාතික ළමා දින සතියේ සමාප්ති උළෙල අග්‍රාමාත්‍ය ආචාර්ය හරිනි අමරසූරිය මෙනවියගේ ප්‍රධානත්වයෙන් ශ්‍රී ජයවර්ධනපුර විශ්වවිද්‍යාලයේදී අද පෙරවරුවේ පැවැත්වීමට නියමිතය. “මනසින් සවිමත් – දරුවන් පොහොසත්” යන කාලෝචිත තේමාව පෙරදැරිව සංවිධානය කර ඇති මෙම වැඩසටහන් මාලාව හරහා දරුවන්ගේ අනාගතය සුරක්ෂිත කිරීම සහ ඔවුන්ගේ මනෝසමාජීය යහපැවැත්ම තහවුරු කිරීම සඳහා දෙමාපියන්ගේ සහ සමස්ත සමාජයේ වගකීම අමාත්‍ය සාවිත්‍රි පෝල්රාජ් මහත්මිය විසින් දැඩි ලෙස අවධාරණය කරනු ලැබ ඇත.
ළමුන් වෙනුවෙන් වෙන් කරනු ලබන අවධානය එක් දිනකට පමණක් සීමා නොවිය යුතු බව පෙන්වා දෙන මනෝවිද්‍යාඥයෝ සහ ළමා රෝග විශේෂඥයෝ, වත්මන් සමාජයේ දරුවන් මුහුණපාන මානසික පීඩනයන් සහ තාක්ෂණයට යැපීම වැනි අභියෝග හමුවේ ඔවුන්ගේ මානසික සෞඛ්‍යය ආරක්ෂා කර ගැනීමට පුළුල් පවුල් පසුබිමක සහ මඟපෙන්වීමක දැඩි අවශ්‍යතාව පවතින බව පෙන්වා දෙති. විශේෂයෙන්ම ළමා වියේදී ලබන අත්දැකීම් සහ රැකවරණය ඔවුන්ගේ අනාගත පෞරුෂ වර්ධනයට මෙන්ම ජාතියේ මානව සම්පතේ ගුණාත්මක භාවයට සෘජුවම බලපාන බැවින්, දරුවන්ගේ අයිතිවාසිකම් සහ සුරක්ෂිතතාව වෙනුවෙන් රාජ්‍ය සහ පෞද්ගලික අංශය එක්ව ක්‍රියාත්මක විය යුතු කාලීන අවශ්‍යතාව මෙම දිනය මගින් යළිත් තහවුරු කෙරේ.
ලෝක ළමා දිනයට සමගාමීව ජාතික සත්වෝද්‍යාන දෙපාර්තමේන්තුව විසින් වයස අවුරුදු 12න් පහළ දරුවන් සඳහා දෙහිවල සත්වෝද්‍යානය සහ පින්නවල අලි අනාථාගාරය අද දින නොමිලේ නැරඹීමට අවස්ථාව සලසා දී ඇති අතර, ළමුන් වෙනුවෙන් විශේෂ විනෝදාත්මක හා අධ්‍යාපනික වැඩසටහන් රාශියක් ද සංවිධානය කර ඇත. අනාගත පරපුර බුද්ධිමත්ව, සෞඛ්‍යසම්පන්නව සහ සවිමත් මනසකින් යුතුව රටට දායාද කිරීම සඳහා මෙවැනි ජාතික මට්ටමේ වැඩසටහන් සංස්කෘතික හා සමාජීය වශයෙන් දැවැන්ත පිටුවහලක් වනු ඇතැයි අපේක්ෂා කෙරේ.
