පසුගිය වසර දෙකක කාලය තුළ වර්තමාන ආණ්ඩුව ගෙන ගිය වැඩපිළිවෙළ හා ක්‍රියාකාරීත්වය සම්බන්ධයෙන් රටේ ජනතාව අතර විශාල ප්‍රසාදයක් පවතින බව නියෝජ්‍ය අමාත්‍ය නාමල් කරුණාරත්න පවසයි.
මාධ්‍ය වෙත අදහස් දක්වමින් නියෝජ්‍ය අමාත්‍යවරයා සඳහන් කළේ ආණ්ඩුවේ සාර්ථකත්වය හමුවේ විපක්ෂයට කර කියාගත හැකි දෙයක් නොමැති වී ඇති බවයි. ඔවුන් සිදුකළ හොරකම් හා දූෂණ සියල්ල හෙළිදරව් වෙමින්, උසාවිවලට, අල්ලස් කොමිසමට සහ බන්ධනාගාර වෙත යෑමට සිදුවී ඇති බව ඔහු පෙන්වා දුන්නේය. නාමල් රාජපක්ෂ රිමාන්ඩ් බන්ධනාගාරයේ සිට පාර්ලිමේන්තුවට පැමිණ කතා කළද, ඔහු කොතැනකදීවත් හෝ පාර්ලිමේන්තු වරප්‍රසාද යටතේවත් තමන් නිර්දෝෂී බවත්, වැරදි චෝදනාවකට හසුවී සිටින බවත් ප්‍රකාශ කර නොමැති බව නියෝජ්‍ය අමාත්‍යවරයා වැඩිදුරටත් අවධාරණය කළේය.
