ශ්‍රී ලංකාවේ ලෝක ප්‍රසිද්ධ සිලෝන් තේ සහ ජනප්‍රිය වීදි ආහාර වන කොත්තු හා පරිප්පු වඩේ ඉතාලියේ රෝම නුවර පැවති එක්සත් ජාතීන්ගේ ආහාර හා කෘෂිකර්ම සංවිධානයේ (FAO) ගෝලීය ප්‍රදර්ශනයේදී විශේෂ අවධානයක් දිනාගෙන තිබේ.
“From Seeds to Foods” යන තේමාව යටතේ ඔක්තෝබර් 8 සිට 12 දක්වා රෝමයේ ඓතිහාසික Circo Massimo පරිශ්‍රයේ පැවති මෙම ප්‍රදර්ශනයට ලොව පුරා සිටි 21,000කට ආසන්න පිරිසක් සහභාගී වූ බව රෝමයේ ශ්‍රී ලංකා තානාපති කාර්යාලය සඳහන් කරයි.
ප්‍රදර්ශනයේ ආසියා සහ පැසිෆික් කලාපීය මණ්ඩපයේ ශ්‍රී ලංකාව වෙනුවෙන් වෙන්වූ ප්‍රදර්ශන කුටියකින් සිලෝන් තේවල සුවිශේෂී රසය සහ ශ්‍රී ලංකාවේ තේ උරුමය පිළිබඳව දැනුවත් කිරීමට අවස්ථාව සලසා තිබිණි. ශ්‍රී ලංකා තේ මණ්ඩලයේ සහයෝගයෙන් ඔක්තෝබර් 8 වැනිදා පැවැත්වූ විශේෂ තේ රස බැලීමේ වැඩසටහනටද විශාල උනන්දුවක් හිමිව ඇත.
ශ්‍රී ලාංකික ආහාර සංස්කෘතිය ප්‍රදර්ශනය කරමින් රෝමයේ La Perla Dell’ Asia අවන්හලේ ප්‍රධාන සූපවේදී ප්‍රවීන් ප්‍රනාන්දු මහතා පරිප්පු වඩේ සහ කොත්තු සකස් කිරීමේ සජීවී ආහාර පිසීමේ වැඩසටහන් පවත්වා තිබේ. ඔක්තෝබර් 11 වැනිදා පැවති කොත්තු සකස් කිරීමේ වැඩසටහන නැරඹීමට සහ එහි රස බැලීමට විශාල පිරිසක් එක්ව සිටියහ.
එහිදී අදහස් දැක්වූ ඉතාලියේ ශ්‍රී ලංකා තානාපති සත්‍ය රොද්‍රිගෝ මහතා, කොත්තුව ශ්‍රී ලංකාවේ විවිධ ආහාර සම්ප්‍රදායන් එකට එක් කරන සංකේතයක් ලෙස හඳුන්වා දී තිබේ.
මේ අතර, චංචලා බුලත්වත්ත මහත්මියගේ ඇකඩමියේ ශ්‍රී ලාංකික සිසුන් ඔක්තෝබර් 9 වැනිදා “Rhythm of Harvest” නමින් සාම්ප්‍රදායික නර්තන අංගයක් ඉදිරිපත් කරමින් ශ්‍රී ලංකාවේ සංස්කෘතික උරුමය ජාත්‍යන්තර ප්‍රේක්ෂකයන් වෙත ගෙන ගොස් ඇත.
ආහාර සුරක්ෂිතතාව සහ පෝෂණය වෙනුවෙන් නවෝත්පාදන ප්‍රවර්ධනය කිරීමේ අරමුණින් FAO සහ World Food Forum එක්ව සංවිධානය කළ මෙම ප්‍රදර්ශනය සඳහා ශ්‍රී ලංකාවේ සහභාගීත්වයට ශ්‍රී ලංකා තේ මණ්ඩලය සහ අපනයන සංවර්ධන මණ්ඩලය සහාය ලබාදී තිබේ.
