ශ්‍රී ලංකා යුද හමුදාවේ කාලතුවක්කු රෙජිමේන්තුවේ නියෝජිත පිරිසක් ශ්‍රී ලංකාව සහ ඉන්දියාව අතර පැවැත්වෙන 11 වැනි යුද හමුදා මාණ්ඩලික සාකච්ඡාවලට සමගාමීව ඉන්දියාවේ ඩියෝලාලිහි කාලතුවක්කු පුහුණු පාසලේ සංචාරයක නිරත වී තිබේ.
ශ්‍රී ලංකා යුද හමුදාව සඳහන් කළේ, දෙරටේ හමුදා අතර වෘත්තීය සබඳතා ශක්තිමත් කිරීම සහ කාලතුවක්කු ක්ෂේත්‍රයට අදාළ දැනුම, විශේෂඥතාව සහ පුහුණු ක්‍රමවේද හුවමාරු කර ගැනීම මෙම සංචාරයේ අරමුණ වූ බවයි.
සංචාරය අතරතුර නියෝජිත පිරිස කාලතුවක්කු වෙඩි තැබීම, යුද මූලධර්ම හා උපක්‍රම පිළිබඳ අංශ, පරීක්ෂණ හා තාක්ෂණ අංශය, ඩියෝලාලි ක්ෂේත්‍ර වෙඩි තැබීමේ පරාසය, සමාකරණ පුහුණු පහසුකම් සහ රුද්‍රනාද් කෞතුකාගාරය ඇතුළු ස්ථාන කිහිපයක් නිරීක්ෂණය කර තිබේ.
මෙම සංචාරය ශ්‍රී ලංකාව සහ ඉන්දියාව අතර අඛණ්ඩව ක්‍රියාත්මක වන හමුදා සහයෝගීතාවයේ කොටසක් වන අතර, වෘත්තීය දැනුම හුවමාරුව සහ දෙරට අතර ආරක්ෂක සබඳතා තවදුරටත් ශක්තිමත් කිරීම එහි ප්‍රධාන අරමුණු වේ.
