දේශගුණික අවදානම් තක්සේරු කිරීම, ආපදා සඳහා පූර්ව සූදානම සහ රෝග නිරීක්ෂණය ඇතුළු මහජන සෞඛ්‍ය සේවා වඩාත් කාර්යක්ෂම කිරීම සඳහා කෘත්‍රිම බුද්ධිය (AI) ඇතුළු නවීන ඩිජිටල් තාක්ෂණයන් සෞඛ්‍ය පද්ධතියට ඒකාබද්ධ කිරීම අත්‍යවශ්‍ය බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පවසයි.
තායිලන්තයේ බැංකොක් නුවර එක්සත් ජාතීන්ගේ සම්මන්ත්‍රණ මධ්‍යස්ථානයේදී අද (28) ආරම්භ වූ පස්වන ආසියා-පැසිෆික් අමාත්‍ය මණ්ඩල සමුළුව (MC-5) අමතමින් අමාත්‍යවරයා මේ බව අවධාරණය කළේය.
එක්සත් ජාතීන්ගේ ආසියා සහ පැසිෆික් කලාපීය ආර්ථික හා සමාජ කොමිසම (UNESCAP) සහ තායිලන්ත රජය එක්ව සංවිධානය කරන මෙම සමුළුවේ උප සභාපතිවරයකු ලෙසද අමාත්‍යවරයා තේරී පත්ව තිබේ.
ගෝලීය තිරසර සංවර්ධන අරමුණු සාක්ෂාත් කරගැනීමේ ප්‍රගතිය අපේක්ෂිත මට්ටමට වඩා මන්දගාමී වී ඇති පසුබිමක, නවීන ඩිජිටල් තාක්ෂණයන් සෞඛ්‍ය පද්ධති සමඟ ඒකාබද්ධ කිරීමෙන් දේශගුණික විපර්යාස හේතුවෙන් මතුවන සෞඛ්‍ය අවදානම් කළමනාකරණයට සහ මහජන සෞඛ්‍ය සේවාවන්හි කාර්යක්ෂමතාව ඉහළ නැංවීමට නව අවස්ථා උදා වන බව ඔහු සඳහන් කළේය.
විශේෂයෙන්ම රෝග නිරීක්ෂණය, දේශගුණය ආශ්‍රිත සෞඛ්‍ය අවදානම් තක්සේරු කිරීම, ආපදා පූර්ව සූදානම සහ සෞඛ්‍ය සේවාවන් වෙත ජනතාවට ඇති ප්‍රවේශය පුළුල් කිරීම සඳහා මෙම තාක්ෂණයන් ඵලදායී ලෙස යොදාගත හැකි බවද අමාත්‍යවරයා පෙන්වා දුන්නේය.
සම්පත් හා තාක්ෂණික ධාරිතා සීමාවන්ට මුහුණ දෙන සංවර්ධනය වෙමින් පවතින රටවලටද නවීන තාක්ෂණයේ ප්‍රතිලාභ ලබාදීමේ වැදගත්කම අවධාරණය කළ ඔහු, තාක්ෂණික දැනුම හුවමාරු කරගැනීම, ජාතික අවශ්‍යතාවලට ගැළපෙන පරිදි තාක්ෂණයන් සකස් කිරීම සහ මානව හා තාක්ෂණික ධාරිතාව වර්ධනය කිරීම සඳහා කලාපීය සහයෝගීතාව ශක්තිමත් කළ යුතු බව සඳහන් කළේය.
සමුළුවට ශ්‍රී ලංකාව නියෝජනය කරමින් සෞඛ්‍ය හා ජනමාධ්‍ය අමාත්‍යාංශයේ ලේකම් වෛද්‍ය අනිල් ජාසිංහ, රාජ්‍ය සේවා කොමිෂන් සභාවේ සාමාජික ඉංජිනේරු (ආචාර්ය) සනත් පනාවැන්න සහ තායිලන්තයේ ශ්‍රී ලංකා තානාපති කාර්යාලයේ නිලධාරීන් ඇතුළු පිරිසක් එක්ව සිටියහ.
