කුමන ආණ්ඩුවක් බලයේ සිටියද මෙරට සෞඛ්‍ය සේවාව පවත්වාගෙන යා යුතු බවත් ඒ සඳහා සියලු අභියෝගයන් හමුවේ වත්මන් ආණ්ඩුව උපරිම කැපවීමෙන් යුතුව ඒ වෙනුවෙන් කැපවී සිටින බවත් සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා පවසයි.
අමාත්‍යවරයා මේ බව ප්‍රකාශ කළේ 27 වනදා කොළඹ “ කිංග්ස්බරි හෝටලයේ” පැවැති “සෞඛ්‍ය මූල්‍ය ප්‍රතිපාදන සැකසීම සඳහා වූ උපදේශන සමුළුවේ”දී ය.
සෞඛ්‍ය ක්ෂේත්‍රයට මූල්‍ය ප්‍රතිපාදන වෙන් කිරීමේදී දැනට පවතින එම ක්‍රමවේදය රටේ වත්මන් තත්ත්වයත් සමග වෙනස් විය යුත්තේ කෙසේද වෙනස් විය යුතු අවස්ථාවන් මොනවාද පවත්නා ක්‍රමවේදය තුළ තිබෙන ගැටලු මොනවා ද යන්න මෙහිදී සාකච්ඡාවට ලක් විය.
මේ සඳහා සෞඛ්‍ය අමාත්‍යාංශය ප්‍රධාන කරගත් ලෝක සෞඛ්‍ය සංවිධානය සෞඛ්‍ය ක්ෂේත්‍රය සදහා බලපාන සියලු රජයේ ආයතන, පෞද්ගලික අංශයේ රෝහල් හා පෞද්ගලික ආයතන ,රාජ්‍ය නොවන සංවිධාන, ඖෂධ සැපයුම්කරුවන් ,වෛද්‍ය ඉංජිනේරු ක්ෂේත්‍රයට අදාල සැපයුම්කරුවන්, සෞඛ්‍ය ක්ෂේත්‍රයේ ඉහළ පරිණත දැනුමක් ඇති නිලධාරීන් හිටපු සෞඛ්‍ය අමාත්‍යවරුන් ඇතුළු විද්වත් මඩුල්ලක් සහභාගි විය.මෙහිදී ඔවුන්ගේ අදහස් හා යෝජනා ලබා ගැනීමද සිදු විය.
ක්ෂේත්‍රයේ ප්‍රවීණයන්ගේ අදහස් විමසීමෙන් අනතුරුව, ප්‍රතිපත්ති සම්පාදකයින්ගේ අදහස් හා යෝජනා ලබා ගැනීමද සිදුවූ අතර , එහිදී ශ්‍රී ලංකාව සඳහා සෞඛ්‍ය මූල්‍ය ප්‍රතිසංස්කරණ විකල්ප පිළිබඳ ඉහළ මට්ටමේ උපදේශක සැසිය ද පැවැත්වූ අතර ඒ සඳහා ජාත්‍යන්තර සෞඛ්‍ය ප්‍රතිපත්ති වැඩසටහනේ ජ්‍යෙෂ්ඨ උපදේශක තායිලන්තයේ Dr.Viroj Tangcharoensathien, දකුණු කොරියාවේ සෝල් ජාතික විශ්වවිද්‍යාලයේ මහජන සෞඛ්‍ය පාසලේ මහාචාර්ය Dr. Soonman Kwon , ඉන්දුනීසියාවේ Gadjah Maha විශ්වවිද්‍යාලයේ වෛද්‍ය පීඨයේ මහාචාර්ය Dr.Laksono Trisnantoro යන ජාත්‍යන්තර මට්ටමේ ප්‍රවීනයන් ද සහභාගි විය. ඒ අනුව එම සියලු අදහස් සම්පිණ්ඩනය කොට ගෙන මූල්‍ය ප්‍රතිපත්ති රාමුවක් සැකසීම මෙහි ප්‍රධානම අංගයයි.
මෙම අවස්ථාවට හිටපු ජනාධිපති මෛත්‍රීපාල සිරිසේන, පාර්ලිමේන්තුවේ කතානායක මහින්ද යාපා අබේවර්ධන, සෞඛ්‍ය රාජ්‍ය අමාත්‍ය සීතා අරඹේපොළ, පාර්ලිමේන්තු මන්ත්‍රීවරුන් වන රාජිත සේනාරත්න, සුදර්ශනී ප්‍රනාන්දුපුල්ලේ, ලෝක සෞඛ්‍ය සංවිධයේ මෙරට නේවාසික නියෝජිත ආචාර්ය අලාකා සිං, සෞඛ්‍ය ලේකම් ජනක චන්ද්‍රගුප්ත ,සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන යන මහත්ම මහත්මින් හා ලෝක සෞඛ්‍ය සංවිධානාය් නියෝජිතයින්, ජාත්‍යන්තර නියෝජිතයින්, සෞඛ්‍ය සේවාවේ වත්මන් හා හිටපු ඉහළ නිලධාරීන් රැසක්ද සහභාගි වූහ.
