දිට්වා සුළිකුණාටුවෙන් පසු රජය සහ රාජ්ය ආයතන ක්රියා කළ ආකාරය පිළිබඳව සමාජ විද්යාඥයින්ගේ සංගමය සිදු කළ සමීක්ෂණයක නවතම දත්ත වාර්තා නිකුත් වී තිබේ. මෙම සමීක්ෂණයට අනුව ජනාධිපති අනුර කුමාර දිසානායක මහතා ආපදා කළමනාකරණය සඳහා සෘජුව මැදිහත් වූ ආකාරය පිළිබඳව 78.7%ක ඉතා ඉහළ ජනතා ප්රසාදයක් හිමි වී ඇත. සමස්ත රජයේ ක්රියාවලිය පිළිබඳව 74.4%ක පිරිසක් සෑහීමකට පත්ව ඇති බව එම වාර්තාවේ සඳහන් වේ.
ආපදා සහන මෙහෙයුම්වලදී රාජ්ය ආයතන සහ දේශපාලන ක්රියාකාරීන් කෙරෙහි ජනතා විශ්වාසය ගොඩනැගී තිබූ ආකාරය පහත පරිදි වේ. සහන මෙහෙයුම්වල නිරත වූ ත්රිවිධ හමුදාව කෙරෙහි 91.2%ක උපරිම විශ්වාසයක් ජනතාව පළ කර ඇති අතර පොලීසිය කෙරෙහි පවතින විශ්වාසය 84.6%කි. ආණ්ඩු පක්ෂයේ දේශපාලනඥයින්ගේ මැදිහත්වීම ගැන 45.8%ක් ප්රසාදය පළ කර ඇති අතර විපක්ෂයේ දේශපාලනඥයින්ගේ කාර්යභාරය පිළිබඳව සෑහීමකට පත්ව ඇත්තේ 23.7%ක් වැනි අඩු පිරිසකි.
සහන සේවා සහ විනිවිදභාවය සම්බන්ධයෙන් ද මෙම සමීක්ෂණයේදී විශේෂ අවධානයක් යොමු කර තිබුණි. හදිසි මුදාගැනීම් (74.6%) සහ සහන ද්රව්ය බෙදාහැරීම (73.1%) යන අංශයන්හි සාර්ථකත්වය ජනතාව ඇගයීමට ලක් කර ඇත. විශේෂයෙන්ම විදේශ ආධාර කළමනාකරණය කිරීමේදී රජය පවත්වා ගත් විනිවිදභාවය පිළිබඳව 71.4%ක ජනතාවක් විශ්වාසය පළ කර තිබේ. ආපදා අවස්ථාවේ වඩාත්ම ඵලදායී ලෙස ආධාර ලබා දුන් රට ලෙස 88%කගේ මනාපයෙන් ඉන්දියාව පෙරමුණේ පසුවන අතර පාකිස්තානය (49.9%) සහ චීනය (43.4%) පිළිවෙළින් ඊළඟ ස්ථාන ලබා ගෙන ඇත.
ආරක්ෂිත මධ්යස්ථානවල පහසුකම් පිළිබඳව යම් චෝදනා ද මෙම වාර්තාව මඟින් පෙන්වා දී තිබේ. ඒ අනුව අහිමි වූ ලියකියවිලි ලබාගැනීමට සහාය නොලැබීම (57.9%), මනෝ සමාජීය සහාය හිමි නොවීම (47.3%) සහ වෛද්ය පහසුකම්වල පවතින අඩුපාඩු (30.5%) පිළිබඳව ජනතාව සිය නොසතුට පළ කර ඇත. එසේම ගංවතුර සහ නායයෑම් අවදානම් සහිත කලාපවල ජනාවාස පිහිටුවීම (51.5%) සහ ගොඩනැගිලි රෙගුලාසි ලිහිල්ව ක්රියාත්මක වීම (41.1%) ආපදා තත්ත්වය දරුණු වීමට ප්රධාන හේතු ලෙස ජනතාව හඳුනාගෙන තිබේ.
