සෞඛ්ය ක්ෂේත්රයේ පවතින ගැටලුවලට විසඳුම් ලබාදීම ප්රමාද වීම හේතුවෙන් මෙරට අහිංසක රෝගී ජනතාව දැඩි පීඩාවකට පත්වන බව මල්වතු අස්ගිරි උභය මහා විහාරීය මහානායක ස්වාමීන්ද්රයන් වහන්සේ දෙනම පවසති. රජයේ වෛද්ය නිලධාරීන්ගේ සංගමයේ (GMOA) නියෝජිත පිරිසක් ඊයේ (19) දින මහනුවරදී උන්වහන්සේලා බැහැදැක වෘත්තීය ගැටලු ඉදිරිපත් කළ අවස්ථාවේදී මෙම අදහස් පළ විය.
මල්වතු පාර්ශවයේ මහානායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියෝ මෙහිදී ප්රකාශ කළේ, රජය පවසන පරිදි භාණ්ඩාගාරයේ මුදල් තිබේ නම් එම මුදල් ප්රදර්ශනය කිරීමට වඩා වැදගත් වන්නේ අවශ්යතා හඳුනාගෙන ඒවා නිසි ලෙස වැය කිරීම බවයි. ලෝකයේ නව බෝවන රෝග ව්යාප්ත වෙමින් පවතින පසුබිමක මෙරට සෞඛ්ය පද්ධතිය ශක්තිමත්ව තිබිය යුතු බවත්, කාර්ය මණ්ඩල හිඟය නිසා ගම්බද රෝහල් වැසී යාම සහ වෛද්යවරුන්ගේ ආරක්ෂාව පිළිබඳ පවතින ගැටලු කෙරෙහි රජය වහා අවධානය යොමු කළ යුතු බවත් උන්වහන්සේ අවධාරණය කළහ.
අස්ගිරි පාර්ශවයේ මහනායක අතිපූජ්ය වරකාගොඩ ශ්රී ඤාණරතන මහනාහිමියෝ අදහස් දක්වමින් කියා සිටියේ රෝහල්වල ඖෂධ හිඟය හේතුවෙන් රෝගීන් පීඩාවට පත්වන බවයි. මෙම ගැටලුවලට විසඳුම් ලබා දීමට ආණ්ඩුවේ මැති ඇමැතිවරුන්ට ප්රමාණවත් උනන්දුවක් පවතින බවක් නොපෙනෙන බවත්, ඉදිරිපත් කරන කරුණු පිළිගැනීමට ඇති අකමැත්ත විශාල ගැටලුවක් බවත් උන්වහන්සේ වැඩිදුරටත් සඳහන් කළහ.
සෞඛ්ය ක්ෂේත්රයේ පවතින ගැටලු ජනතාවගේ ජීවිත සමඟ ඍජුව බැඳී පවතින බැවින්, ඒවා දේශපාලනික පදනමකින් තොරව කඩිනමින් විසඳීම රජයේ වගකීමක් බව මහානායක හිමිවරු දෙනම මෙහිදී සිහිපත් කළහ.
