රුසියානු – යුක්රේන යුද්ධයට සහභාගී වීම සඳහා විවිධ උපක්රම මගින් රුසියාවට ගෙන්වා ගත් ඝානා ජාතිකයන් 272 දෙනෙකු අතුරින් අවම වශයෙන් 55 දෙනෙකු ජීවිතක්ෂයට පත්ව ඇති බව ඝානා විදේශ අමාත්ය සැමුවෙල් ඔකුඩෙටෝ අබ්ලක්වා (Samuel Okudzeto Ablakwa) මහතා අනාවරණය කරයි. යුක්රේනයේ කිව් (Kyiv) අගනුවර සංචාරයක නිරත වීමෙන් පසු ඔහු සඳහන් කළේ, ඉහළ වැටුප් සහිත රැකියා ලබා දෙන බවට පොරොන්දු වෙමින් මෙම තරුණයන්ව යුද පෙරමුණට යොමු කර ඇති බවයි.යුක්රේන විදේශ අමාත්ය ඇන්ඩ්රි සිබිහා (Andrii Sybiha) මහතා පෙන්වා දෙන්නේ අප්රිකානු රටවල් 36ක පුද්ගලයන් 1,780කට අධික පිරිසක් මේ වන විට රුසියානු හමුදාව වෙනුවෙන් සටන් වදින බවයි. ඝානාවට අමතරව දකුණු අප්රිකාව, කෙන්යාව වැනි රටවල තරුණයන් ද මෙලෙස රුසියාවේ ‘මිනිස් පලිහක්’ ලෙස භාවිත වන බවට තොරතුරු වාර්තා වී තිබේ. කෙන්යානු බුද්ධි අංශ වාර්තාවලට අනුව කෙන්යානු ජාතිකයන් 1,000කට අධික පිරිසක් රුසියානු හමුදාවට බඳවා ගෙන ඇති අතර ඉන් 27 දෙනෙකු බේරා ගැනීමට එරට රජය සමත් වී ඇත.මෙම නීති විරෝධී බඳවා ගැනීම් පිටුපස ‘Dark Web’ හරහා ක්රියාත්මක වන ජාවාරම්කරුවන් සිටින බවත්, ඔවුන්ව මර්දනය කිරීමට සහ තරුණයන් දැනුවත් කිරීමට ඝානා රජය පියවර ගන්නා බවත් අමාත්ය අබ්ලක්වා අවධාරණය කළේය. දකුණු අප්රිකාවේ හිටපු ජනාධිපති ජේකොබ් සූමාගේ දියණියක ද මෙවැනි ජාවාරමකට සම්බන්ධ බවට එරට පොලිසිය පරීක්ෂණ පවත්වයි. ශ්රී ලංකාවේ ද හිටපු හමුදා සාමාජිකයන් විශාල පිරිසක් රුසියානු – යුක්රේන යුද්ධයට හසු වී ඇති පසුබිමක, මෙම ජාත්යන්තර වර්ධනයන් පිළිබඳව අවධානයෙන් පසුවීම අතිශය වැදගත් වේ.
