ශ්රී ලංකාවේ නිෂ්පාදන ක්ෂේත්රය ජාත්යන්තර මට්ටමට ඔසවා තැබීම සඳහා ලබාදුන් සුවිශේෂී නායකත්වය අගය කරමින්, මලිබන් සමූහ ව්යාපාරයේ සභාපතිනී කුමුදිකා ප්රනාන්දු මහත්මිය (Kumudika Fernando) ‘CEO of the Year Awards 2025’ සම්මාන උළෙලේදී විශේෂ ඇගයීමකට ලක්ව තිබේ. මලිබන් සන්නාමය දේශීය සීමාවන්ගෙන් ඔබ්බට ගෙන යමින් එහි මෙහෙයුම් සාර්ථකත්වය සහ ගෝලීය ව්යාප්තිය තහවුරු කිරීමට ඇය දැක්වූ දායකත්වය මෙම සම්මානය සඳහා පදනම වී ඇත.
ඇයගේ නායකත්වය යටතේ මලිබන් සමාගම අත්කරගත් සුවිශේෂී ජයග්රහණයක් වන්නේ ඉන්දියාවේ ‘Reliance Consumer Products’ සමාගම සමඟ ඇති කරගත් දැවැන්ත හවුල්කාරිත්වයයි. මෙමගින් මලිබන් නිෂ්පාදන සඳහා ඉන්දියාවේ දැවැන්ත සිල්ලර වෙළඳ ජාලය විවෘත වූ අතර, එය ශ්රී ලාංකීය සන්නාමයක් කලාපීය මට්ටමින් ලැබූ විශාල ජයග්රහණයක් ලෙස සැලකේ. එමෙන්ම ගුණාත්මකභාවය පිළිබඳ මලිබන් පවුලේ සාම්ප්රදායික විශ්වාසය ආරක්ෂා කරගනිමින් නව නිෂ්පාදන හඳුන්වා දීමට ද ඇය සමත් වී තිබේ.
ව්යාපාරික ක්ෂේත්රයට අමතරව, ක්රීඩාව මගින් තරුණ පරපුර දිරිමත් කිරීම සඳහා ද කුමුදිකා ප්රනාන්දු මහත්මිය විශාල උනන්දුවක් දක්වයි. 2025 වසරේ නවසීලන්ත කිලෝග්රෑම් 85න් පහළ රග්බි කණ්ඩායමේ ශ්රී ලංකා සංචාරයට සහ මෙරට නැගී එන මෝටර් රථ ධාවන ශූර යෙවාන් ඩේවිඩ් (Yevan David) හට අනුග්රහය දැක්වීම මීට උදාහරණ වේ. මෙම සම්මානය මලිබන් සන්නාමය ජාත්යන්තර තලයේ තවදුරටත් ශක්තිමත් කිරීමට සහ ශ්රී ලංකාවට ආඩම්බරයක් ගෙන ඒමට මහත් රුකුලක් වනු ඇත.
