ශ්රී ලංකාවේ ආර්ථික පුනර්ජීවනය ලෝකයාට ප්රදර්ශනය කිරීමේ අරමුණින් ආයෝජන මණ්ඩලය (BOI), යුරෝපා සංගමය, ආසියානු සංවර්ධන බැංකුව සහ UN ESCAP ආයතනය සමඟ එක්ව “ශ්රී ලංකා ආයෝජන සමුළුව 2026″ (Sri Lanka Investment Forum 2026) එළඹෙන මාර්තු 30 වනදා Cinnamon Life පරිශ්රයේදී පැවැත්වීමට කටයුතු යොදා තිබේ. ස්ථාවර සාර්ව ආර්ථික පදනමක් සහ විනයගරුක ප්රතිසංස්කරණ මධ්යයේ පැවැත්වෙන මෙම සමුළුව හරහා ඉහළ වර්ධන විභවයක් සහිත නව ආයෝජන අවස්ථා රැසක් ගෝලීය ප්රජාවට විවෘත වනු ඇත.
“ශ්රී ලංකාවේ හරිත සහ සබඳතා පිරි අනාගතයක් වෙනුවෙන් ආයෝජනය” යන තේමාව යටතේ පැවැත්වෙන මෙම සමුළුවේදී තාක්ෂණය පදනම් කරගත් කර්මාන්ත, තිරසාර සැපයුම් දාම සහ දේශගුණික ඔරොත්තු දීමේ හැකියාව සහිත ව්යාපෘති කෙරෙහි විශේෂ අවධානයක් යොමු කෙරේ. විශේෂයෙන්ම 2030 වසර වන විට විදුලි උත්පාදනයෙන් 70%ක් පුනර්ජනනීය බලශක්තියෙන් ලබා ගැනීමේ ඉලක්කය යටතේ සූර්ය, සුළං සහ හරිත හයිඩ්රජන් ව්යාපෘති සඳහා ආයෝජකයින්ට ආරාධනා කෙරේ. 2025 වසරේදී පමණක් ශ්රී ලංකාව ඇමරිකානු ඩොලර් බිලියනයකට අධික සෘජු විදේශ ආයෝජන (FDI) ආකර්ෂණය කර ගැනීම ජාත්යන්තර විශ්වාසය යළි තහවුරු වීමේ සුවිශේෂී සන්ධිස්ථානයක් ලෙස සැලකේ.
ආයෝජන මණ්ඩලයේ අධ්යක්ෂ ජනරාල් රේණුකා එම්. වීරකෝන් මහත්මිය සඳහන් කළේ, මෙම සමුළුව හරහා විනිවිදභාවයකින් යුත් කාර්යක්ෂම අනුමැතිය ලබාදීමේ යාන්ත්රණයක් මගින් ආයෝජකයින්ට ශ්රී ලංකාව සමඟ දිගුකාලීන හවුල්කාරිත්වයකට අවස්ථාව සලසා දෙන බවයි. 2025 වසරේ මුල් මාස නවය තුළ සියයට 5ක දළ දේශීය නිෂ්පාදිතයේ වර්ධනයක් වාර්තා කිරීමත්, 2026 වසර සඳහා සියයට 4ත් 5ත් අතර වර්ධන වේගයක් සහ ස්ථාවර උද්ධමන මට්ටමක් ප්රක්ෂේපණය කිරීමත් නිසා ශ්රී ලංකාව මේ වන විට ඉන්දියන් සාගර කලාපයේ ප්රබල ආයෝජන කේන්ද්රස්ථානයක් ලෙස යළි ඉස්මතු වෙමින් පවතී.
ලොජිස්ටික්ස්, ගුවන් සේවා, ඖෂධ නිෂ්පාදනය, සංචාරක කර්මාන්තය සහ නවීන තාක්ෂණික උද්යාන වැනි විවිධ ක්ෂේත්ර රැසක ආයෝජන අවස්ථා පිළිබඳව මෙහිදී සාකච්ඡා කිරීමට නියමිතය. මෙම සුවිශේෂී ආයෝජන අවස්ථාවන් පිළිබඳ වැඩිදුර තොරතුරු ලබා ගැනීමට සහ ලියාපදිංචි වීමට srilankainvestmentforum.com වෙබ් අඩවියට පිවිසිය හැකිය.
