පැසිෆික් සාගරයේ නැගෙනහිර කලාපයේ ධාවනය වූ මත්ද්රව්ය ජාවාරම්කරුවන්ට අයත් බව සැක කෙරෙන යාත්රාවකට ඊයේ (08) ඇමරිකානු හමුදාව එල්ල කළ ප්රහාරයකින් පුද්ගලයින් හය දෙනෙකු ජීවිතක්ෂයට පත්ව තිබේ. ට්රම්ප් පරිපාලනය විසින් “මත්ද්රව්ය ත්රස්තවාදීන්” (Narco-terrorists) ඉලක්ක කර ගනිමින් ආරම්භ කළ මෙහෙයුම් මාලාවේ නවතම පියවර මෙය වන අතර, ඒ අනුව පසුගිය සැප්තැම්බර් මාසයේ සිට මේ දක්වා මියගිය සංඛ්යාව 157 දක්වා ඉහළ ගොස් ඇත.
ඇමරිකානු දකුණු බලකාය (US Southern Command) විසින් නිකුත් කරන ලද වීඩියෝ දර්ශනවලට අනුව, සාගරයේ ගමන් කරමින් තිබූ කුඩා යාත්රාවක් ප්රහාරයකින් සම්පූර්ණයෙන්ම විනාශ වී යන ආකාරය දැකගත හැකිය. කෙසේ වෙතත්, එම යාත්රාවේ මත්ද්රව්ය තිබූ බවට මෙතෙක් නිශ්චිත සාක්ෂි ඉදිරිපත් කර නොමැති වීම විශේෂත්වයකි. ලතින් ඇමරිකානු මත්ද්රව්ය ජාවාරම්කරුවන් සමඟ ඇමරිකාව “සන්නද්ධ ගැටුමක” නිරතව සිටින බව ජනාධිපති ඩොනල්ඩ් ට්රම්ප් මීට පෙර ප්රකාශ කර තිබුණි.
පසුගිය සෙනසුරාදා ලතින් ඇමරිකානු නායකයින් සමඟ පැවැත්වූ හමුවකදී ද ට්රම්ප් මහතා අවධාරණය කළේ කලාපීය ආරක්ෂාවට තර්ජනයක් වන මත්ද්රව්ය කල්ලි මර්දනය කිරීමට ඇමරිකාව සමඟ එක්වන ලෙසයි. මේ යටතේ ඉක්වදෝරය සහ ඇමරිකානු හමුදා එක්ව පසුගිය සතියේ ඒකාබද්ධ මෙහෙයුම් කිහිපයක් ද දියත් කර තිබුණි. එහෙත්, මෙම ප්රහාරවල නීත්යානුකූලභාවය සහ සාර්ථකත්වය පිළිබඳව විවිධ පාර්ශවයන් ප්රශ්න කරමින් සිටිති.
විශේෂයෙන්ම ඇමරිකාව තුළ සිදුවන මත්ද්රව්ය මරණවලට ප්රධාන හේතුවක් වන ෆෙන්ටැනිල් (Fentanyl) වැනි මත්ද්රව්ය ගොඩබිම් මාර්ග හරහා මෙක්සිකෝවෙන් ඇතුළු වන පසුබිමක, සාගරයේ යාත්රාවලට ප්රහාර එල්ල කිරීමේ ඵලදායීතාවය විචාරකයින්ගේ විවේචනයට ලක්ව ඇත. තවද, පළමු ප්රහාරයෙන් පසු ඉතිරි වූවන් ඉලක්ක කර යළි ප්රහාර එල්ල කිරීම “යුද අපරාධයක්” විය හැකි බවට ද නීති විශේෂඥයින් මත පළ කර තිබේ.
