ආසියානු කුසලාන කාන්තා පාපන්දු තරගාවලියට සහභාගී වීම සඳහා ඕස්ට්රේලියාවට පැමිණ සිටින ඉරාන කාන්තා පාපන්දු කණ්ඩායම යළි සිය රට බලා යාමට නියමිතව ඇති පසුබිමක, ඔවුන්ගේ ආරක්ෂාව පිළිබඳ ජාත්යන්තර මට්ටමේ දැඩි කනස්සල්ලක් මතුව තිබේ. විශේෂයෙන්ම තරගාවලියේ පළමු තරගයේදී ඉරාන ජාතික ගීය ගැයීමෙන් වැළකී සිටීම හේතුවෙන් එරට රජයට සම්බන්ධ පාර්ශවයන් විසින් ඔවුන් “යුද කාලීන ද්රෝහීන්” ලෙස හඳුන්වා ඇති අතර, ඔවුන්ට එරෙහිව දැඩි ක්රියාමාර්ග ගත යුතු බවට ද බලපෑම් එල්ල වී ඇත.
දැනට ඕස්ට්රේලියාවේ ‘ගෝල්ඩ් කෝස්ට්’ (Gold Coast) හි හෝටලයක රැඳී සිටින මෙම ක්රීඩිකාවන්ගේ වීසා කාලය අවසන් වීමට ආසන්න බැවින්, ඔවුන් යළි ඉරානයට ගෙන යාමට එරට නිලධාරීන් කඩිනමින් කටයුතු කරමින් සිටින බව වාර්තා වේ. ක්රීඩිකාවන් පසුව පැවැති තරගවලදී ජාතික ගීය ගැයීමට සහ ආචාර කිරීමට කටයුතු කළද, එය බලහත්කාරයෙන් හෝ බිය වැද්දීමෙන් සිදු කළ එකක් බවට මානව හිමිකම් ක්රියාකාරීහු සැක පළ කරති.
ඕස්ට්රේලියානු රජයට සහ ජාත්යන්තර පාපන්දු සම්මේලනයට (FIFA) බලපෑම් එල්ල වෙමින් පවතින්නේ මෙම ක්රීඩිකාවන්ට අවශ්ය නම් දේශපාලන රැකවරණ (Asylum) ලබා දීමට කටයුතු කරන ලෙසයි. ඕස්ට්රේලියාවේ විපක්ෂය ද රජයෙන් ඉල්ලා සිටින්නේ මෙම කාන්තාවන් මුහුණ දී ඇති අනතුර හමුවේ ඇස් පියාගෙන නොසිටින ලෙසයි. එහෙත්, ක්රීඩිකාවන් දැඩි නිරීක්ෂණයට සහ පාලනයට ලක්ව ඇති බැවින් ඔවුන්ට තමන්ගේ අභිමතය ප්රකාශ කිරීමට අවස්ථාවක් ලැබී නොමැති බව නීති විශේෂඥයෝ පෙන්වා දෙති.
ක්රීඩිකාවන්ගේ ආරක්ෂාව වෙනුවෙන් පෙනී සිටින Fifpro සංවිධානය අවධාරණය කරන්නේ ක්රීඩිකාවන්ට තමන්ගේ අනාගතය පිළිබඳ ස්වාධීන තීරණයක් ගැනීමට අවස්ථාව ලබා දිය යුතු බවයි. ඕස්ට්රේලියාවේ ඉරාන-ඕස්ට්රේලියානු ප්රජාව ද ක්රීඩිකාවන් වෙනුවෙන් පෙත්සම් අත්සන් කරමින් රජයට බලපෑම් කරමින් සිටින අතර, මෙම ක්රීඩිකාවන් යළි ඉරානයට ගියහොත් ඔවුන්ට සහ ඔවුන්ගේ පවුල්වල සාමාජිකයින්ට දැඩි දඬුවම් විඳීමට සිදුවනු ඇතැයි ඔවුහු බිය පළ කරති.
