ශ්රී ලංකාවේ බලශක්ති ක්ෂේත්රයේ වසර 50ක පමණ ඉතිහාසයක් නිමා කරමින් 2024 අංක 36 දරන විදුලිබල පනත යටතේ ලංකා විදුලිබල මණ්ඩලය නිල වශයෙන් අහෝසි කර ඇති අතර එහි බෙදාහැරීමේ කටයුතු Electricity Distribution Lanka (Private) Limited (EDL) වෙත පවරා දී ඇත. ඊයේ මධ්යම රාත්රියේ සිට මෙම නව ව්යුහය ක්රියාත්මක වූ අතර පාරිභෝගික ජනතාවට සහ පාර්ශවකරුවන්ට දැනුම් දී ඇත්තේ මින් ඉදිරියට විදුලිය බෙදාහැරීම සහ පාරිභෝගික සේවා කටයුතු මෙම නව සමාගම හරහා සිදු කෙරෙන බවයි.
මෙම වෙනසත් සමඟ ලංවිම සතුව තිබූ වගකීම් සමාගම් 6ක් අතර බෙදී යන අතර එහිදී විදුලිය බෙදාහැරීමේ ක්රියාවලිය වඩාත් නවීන සහ විනිවිදභාවයකින් යුත් ආයතනික රාමුවක් තුළ පවත්වාගෙන යාම මගින් කාර්යක්ෂමතාව ඉහළ නැංවීමට EDL සමාගම අපේක්ෂා කරයි. එමෙන්ම විදුලිය බිඳවැටීම් අවම කිරීම සහ පාරිභෝගික පැමිණිලි සඳහා කඩිනම් විසඳුම් ලබා දෙන තාක්ෂණික ක්රමවේද හඳුන්වා දෙමින් සේවා ගුණාත්මකභාවය ඉහළ නැංවීමට ද පියවර ගනු ඇත. දැනටමත් ලංවිම සතුව තිබූ නිල සමාජ මාධ්ය පිටු EDL නමින් යාවත්කාලීන කර ඇති අතර නවීන මෘදුකාංග සහ ගෙවීම් ක්රම හරහා පාරිභෝගිකයාට සමීප වීමට ඩිජිටල්කරණ වැඩපිළිවෙළක් ද ක්රියාත්මක වේ.
මෙම නව ව්යුහය යටතේ ඉංජිනේරු කේ.එස්.අයි. කුමාර මහතා EDL හි ප්රධාන විධායක නිලධාරී ලෙස පත් කර ඇති අතර ලංවිම සතුව තිබූ රුපියල් බිලියන 20ක ණයකර වගකීම ද මෙම නව සමාගම වෙත පවරා දී තිබේ. පවතින සේවක ප්රතිලාභ වෙනස් නොවන බව රජය පවසන නමුත් සේවකයින් 2,000කට වැඩි පිරිසක් දැනටමත් ස්වේච්ඡා විශ්රාම ගැන්වීමේ ක්රමය තෝරාගෙන ඇති බව වාර්තා වේ. කෙසේ වෙතත් හදිසි ඇමතුම් අංක සහ දැනට පවතින බිල්පත් ගෙවීමේ ක්රමවේදයන්හි කිසිදු වෙනසක් සිදු නොවන බව බලධාරීන් පාරිභෝගික ජනතාවට සහතික වෙයි.
