රටේ දින 45කට ප්රමාණවත් තෙල් සංචිත පවතින බවට ජනාධිපතිවරයා සහ විෂයභාර අමාත්යවරයා සහතික වී තිබියදී හදිසියේම තෙල් මිල ඉහළ දැමීම පිටුපස බරපතල අක්රමිකතාවක් පවතින බව ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා ප්රකාශ කළේය. අද (10) නෙළුම් මාවත පක්ෂ කාර්යාලයේ පැවති මාධ්ය හමුවකදී ඒ මහතා පෙන්වා දුන්නේ, ලෝක වෙළඳපොළේ මිල ගණන් අනුව මිල වැඩි කළ බව ආණ්ඩුව පැවසුවද, මිල වැඩි කර පැය 24ක් යන්නටත් මත්තෙන් ලෝක වෙළඳපොළේ මිල පහත වැටී ඇති බවයි. ගල් අඟුරු ටෙන්ඩරය හිතාමතාම ප්රමාද කර බාල ගල් අඟුරු ගෙන්වීම හරහා සිදුවූ මහා පරිමාණ වංචාවේ පාඩුව පියවා ගැනීමට ආණ්ඩුව මෙලෙස තෙල් මිල ඉහළ දමා ජනතාව පීඩාවට පත් කරන බවට ඔහු සාධාරණ සැකයක් පළ කළේය.
මැදපෙරදිග කලාපයේ පවතින යුදමය වාතාවරණය හමුවේ ඇතිවිය හැකි ආහාර සහ බලශක්ති අර්බුදයට මුහුණ දීම සඳහා ආණ්ඩුව සතුව විධිමත් කෙටි හෝ මධ්යකාලීන වැඩපිළිවෙළක් නොමැති බව මන්ත්රීවරයා මෙහිදී අවධාරණය කළේය. එංගලන්තය සහ ඕස්ට්රේලියාව වැනි රටවල් පවා මෙවැනි ලෝක තත්ත්වයන් හමුවේ පෙර සූදානමක සිටියදී, ශ්රී ලංකා රජය මැයි දින රැලි පිළිබඳව පමණක් අවධානය යොමු කරමින් සිටින බව ඔහු පැවසීය. විශේෂයෙන්ම වී අස්වනු නෙළන මෙම කාලසීමාව තුළ වී සඳහා සාධාරණ මිලක් ලබා දීමට හෝ ගොවීන්ට අවශ්ය පොහොර ලබා දීමට රජය අපොහොසත් වී ඇති බවත්, ඒ වෙනුවට සහල් සහ එළවළු පිටරටින් ගෙන්වීමට උත්සාහ කරන බවත් ඔහු චෝදනා කළේය.
එසේම, විදේශ අමාත්යවරයාගේ ක්රියාකලාපය සහ භාෂා භාවිතය පිළිබඳවද අදහස් දැක්වූ නාමල් රාජපක්ෂ මහතා සඳහන් කළේ, ජාත්යන්තර මාධ්ය හමුවේදී ප්රශ්න තේරුම් ගැනීමට අපොහොසත් වන්නේ නම් පරිවර්තකයෙකුගේ සහාය ලබා ගැනීම වඩාත් සුදුසු බවයි. ලක්ෂ්මන් කදිරගාමර් වැනි අමාත්යවරුන් රට වෙනුවෙන් කළ සේවය සිහිපත් කළ ඔහු, ජනාධිපතිවරයා විසින්ම “පාපිසි” ලෙස හඳුන්වන පුද්ගලයන් කැබිනට් මණ්ඩලයට පත් කිරීමේ ප්රතිඵල අද රටම විඳවමින් සිටින බව ද පැවසීය. මැයි දින සැමරුම් පිළිබඳ සිතීමට පෙර ජනතාවට අත්යවශ්ය ආහාර පාන සහ සේවා අඛණ්ඩව ලබා දීමේ ක්රමවේදයක් සැකසීමට ජනාධිපතිවරයා වහාම පියවර ගත යුතු බව ඔහු වැඩිදුරටත් අවධාරණය කළේය.
