මැදපෙරදිග කලාපයේ පවතින උණුසුම් ආරක්ෂක වාතාවරණය හේතුවෙන්, එළඹෙන අප්රේල් මාසයේ පැවැත්වීමට නියමිතව තිබූ 2026 ෆෝමියුලා 1 (Formula 1) තරගාවලියේ බහරේන් සහ සෞදි අරාබි ග්රෑන්ඩ් ප්රී තරග නිල වශයෙන් අවලංගු කිරීමට පියවර ගෙන තිබේ. ෆෝමියුලා 1 සංවිධායකයින් සහ ජාත්යන්තර මෝටර් රථ සම්මේලනය (FIA) එක්ව ගත් මෙම තීරණයට ප්රධානතම හේතුව වී ඇත්තේ ක්රීඩකයින්, කණ්ඩායම් සාමාජිකයින් සහ සේවකයින්ගේ ආරක්ෂාව සහ යහපැවැත්ම තහවුරු කිරීමයි.
බහරේන් සහ සෞදි අරාබි තරගාවලි පවත්වන ක්රීඩාංගණ අවට පවතින ආරක්ෂක අවදානම් පිළිබඳව දැඩි ලෙස සලකා බැලීමෙන් අනතුරුව මෙම තීරණයට එළඹ ඇති අතර, මේ හේතුවෙන් 2026 තරගාවලියේ මුළු තරග සංඛ්යාව 24 සිට 22 දක්වා අඩු වී තිබේ. අවලංගු කළ තරග වෙනුවට වෙනත් රටක තරග පැවැත්වීමට මේ වන විට අදහසක් නොමැති බව ද සංවිධායකයින් වැඩිදුරටත් සඳහන් කරයි. මැදපෙරදිග යුදමය තත්ත්වය ජාත්යන්තර ක්රීඩා ලෝකයට ද මේ වන විට ඍජු බලපෑම් එල්ල කරමින් පවතී.
