මැදපෙරදිග කලාපයේ පවතින යුදමය වාතාවරණය හමුවේ ඉන්ධන මිල පාලනය කිරීම සඳහා ජපානය සිය උපායමාර්ගික තෙල් සංචිත (Strategic oil reserves) නිදහස් කිරීම අද (2026 මාර්තු 16) ආරම්භ කර තිබේ. ජාත්යන්තර බලශක්ති ඒජන්සියේ (IEA) උපදෙස් මත මෙම පියවර ගෙන ඇති අතර, අනෙකුත් කලාපවලට පෙර ආසියානු සහ ඕෂනියා කලාපයේ රටවල් මෙලෙස හදිසි තෙල් තොග මුදා හැරීමට පියවර ගෙන ඇත. ජපානයේ නිල රජයේ ගැසට් පත්රය මඟින් ද මේ වන විට රටේ පවතින තෙල් සංචිත මට්ටම පහත දමා ඇති බව තහවුරු කර ඇති බව විදෙස් පුවත් සේවා වාර්තා කරයි.
ජපානය සිය තෙල් අවශ්යතාවයෙන් 95%ක්ම සපුරා ගනු ලබන්නේ මැදපෙරදිග රටවලින් ආනයනය කිරීම මඟිනි. හෝමූස් සමුද්ර සන්ධියේ පවතින අවහිරතා සහ ඉරානය සමඟ උද්ගතව ඇති ගැටුම් හේතුවෙන් තෙල් සැපයුමට එල්ල වී ඇති බාධා හමුවේ, දේශීය වෙළඳපොළ ස්ථාවරව තබා ගැනීමට මෙම තීරණය අතිශය වැදගත් වේ. ජාත්යන්තර බලශක්ති ඒජන්සිය විසින් මීට පෙර නිවේදනය කළේ ලෝක තෙල් මිල පහත දැමීම සඳහා බැරල් මිලියන 412ක දැවැන්ත තොගයක් සාමූහිකව වෙළඳපොළට මුදා හරින බවයි.
