2026 අසාම් ප්රාන්ත සභා මැතිවරණය වෙනුවෙන් භාරතීය ජනතා පක්ෂය (BJP) සිය ප්රථම අපේක්ෂක ලැයිස්තුව අද (මාර්තු 19) නිකුත් කරන ලදී. මෙහි විශේෂත්වය වන්නේ මෑතකදී කොංග්රස් පක්ෂය අතහැර භාරතීය ජනතා පක්ෂයට එක් වූ ජ්යෙෂ්ඨ නායකයින් කිහිපදෙනෙකුටම මෙවර මැතිවරණය සඳහා අවස්ථාව හිමිව තිබීමයි. නවදිල්ලි නුවරදී අග්රාමාත්ය නරේන්ද්ර මෝදිගේ ප්රධානත්වයෙන් පැවැති මධ්යම මැතිවරණ කමිටු රැස්වීමේදී මෙම නාමලේඛනය ස්ථිර කර ඇත.
අසාම් මහ ඇමති හිමන්ත බිස්වා සර්මා (Himanta Biswa Sarma) සිය සුපුරුදු ආසනය වන ජලුක්බාරි (Jalukbari) ආසනයෙන් තරඟ කිරීමට නියමිතය. ඊයේ දින පක්ෂයට එක් වූ නාගෝන් ලෝක් සභා මන්ත්රී ප්රද්යුත් බෝර්ඩොලෝයි (Pradyut Bordoloi) හට දිස්පූර් (Dispur) ආසනය සඳහාත්, හිටපු කොංග්රස් සභාපති භූපේන් කුමාර් බෝරා (Bhupen Kumar Borah) හට බිහ්පුරා (Bihpura) ආසනය සඳහාත් නාම යෝජනා ලබා දී ඇත. මීට අමතරව මාධවී දාස් (බිර්සිං-ජරුවා), ජ්යෝත්සනා කල්පිතා (චමාරියා) සහ නිලීමා දේවි (මංගල්ඩායි) යන කාන්තා නියෝජිතවරියන් ද මෙවර මැතිවරණ සටනට පිවිසීමට නියමිතය.
අප්රේල් 9 වනදා පැවැත්වීමට නියමිත මෙම මැතිවරණය සඳහා භාරතීය ජනතා පක්ෂය සිය ජයග්රහණය තහවුරු කර ගැනීම වෙනුවෙන් ප්රබල අපේක්ෂකයින් පිරිසක් ඉදිරිපත් කර ඇති බව දේශපාලන විචාරකයෝ පවසති. කොංග්රස් පක්ෂයේ ජ්යෙෂ්ඨයින් පිරිසක් මැතිවරණයට පෙර පක්ෂයට එක් කර ගැනීම හරහා සිය බලය තවදුරටත් වර්ධනය කර ගැනීමට භාරතීය ජනතා පක්ෂයට හැකි වී තිබේ.
