එස්තෝනියාවේ තෙවන විශාලතම නගරය වන නර්වා (Narva) කේන්ද්ර කරගනිමින් “නර්වා මහජන සමූහාණ්ඩුව” (People’s Republic of Narva) යනුවෙන් බෙදුම්වාදී මතවාදයක් සමාජ මාධ්ය හරහා ප්රචාරය වෙමින් පවතින බව බුද්ධි අංශ වාර්තා කරයි. මෙය මීට පෙර යුක්රේනයේ දොන්බාස් ප්රදේශයේ රුසියානු හිතවාදීන් අනුගමනය කළ ක්රමවේදයට සමාන වන අතර එස්තෝනියාවේ වෙසෙන රුසියානු භාෂාව කතා කරන ජනතාව උසිගැන්වීම මෙහි ප්රධාන අරමුණ වී තිබේ.
නර්වා නගරයේ ජනගහනය 53,000ක් පමණ වන අතර ඉන් 90%කට වඩා වැඩි පිරිසක් රුසියානු භාෂාව කතා කරන පිරිස් වේ. මොවුන්ගෙන් බහුතරයක් එස්තෝනියානු පුරවැසියන් වුවද රුසියානු රාජ්ය මාධ්ය දිගු කලක සිට ඔවුන් “පීඩාවට පත් සුළුතරයක්” ලෙස හුවා දක්වමින් ප්රචාරණ මෙහෙයවයි. විශේෂයෙන්ම 2026 පෙබරවාරි 18 වනදා සිට ක්රියාත්මක වන “Narva Republic” ටෙලිග්රෑම් නාලිකාව හරහා සන්නද්ධ අරගල සහ කඩාකප්පල්කාරී ක්රියාවලට පෙළඹවීම් සිදු කෙරෙන අතර එහිදී අසත්ය තොරතුරු සහ මීම් (Memes) භාවිතා කරමින් ජනතාව අතර භීතිය සහ ව්යාකූලත්වය ඇති කිරීමට උත්සාහ දරයි.
යුද විශේෂඥයින් පවසන පරිදි නර්වා හි ගැටුමක් ඇති වුවහොත් ලිතුවේනියාවේ පබ්රාඩ් (Pabradė) හි ස්ථානගත කර ඇති ජර්මානු Battletank Brigade 45 බලකාය වහාම ක්රියාත්මක වීමට නියමිතය. මෙම බලකාය නර්වා නගරයේ සිට කිලෝමීටර් 400ක් පමණ දුරින් පිහිටා ඇත. එස්තෝනියානු අභ්යන්තර බුද්ධි සේවය (ISS) පවසන්නේ මෙය රුසියාව විසින් මෙහෙයවන අඩු පිරිවැයකින් යුත් මනෝවිද්යාත්මක යුද මෙහෙයුමක් බවත් සමාජයේ සහජීවනය බිඳ දැමීම මෙහි අවසන් ඉලක්කය බවත්ය.
නර්වා නගරය රුසියානු දේශසීමාවට ඉතා ආසන්නව පිහිටා ඇති බැවින් මෙම තත්ත්වය යුරෝපයේ ආරක්ෂාවට සහ නැටෝ සංවිධානයේ නැගෙනහිර සීමාවට එල්ල වී ඇති බරපතල තර්ජනයක් ලෙස සැලකේ.
