අනුරාධපුරයේ වැසුනු වී ගබඩාව නුදුරේම වීවෘත කරන බව මන්ත්‍රී දුමින්දගෙන් පොරොන්දුවක්
අනුරාධපුර දිස්ත්රික්කයේ කැකිරාව ප්‍රාදේශීය ලේකම් කොට්ඨාශයේ දුම්රිය නගර ප්‍රදේශයේ භාවිතයට නොගෙන විනාශ වෙමින් පවතින රජයේ ගබඩා සංකීරණය නැවත ගොවි ජනතාව වෙනුවෙන් කඩිනමන් විවෘත කිරීමට අවශ්‍යය පියවර ගන්නා බව ශ්රී ලංකා නිදහස් පක්ෂ ජාතික සංවිධායක, අනුරාධපුර දිස්ත්රික් පාර්ලිමේන්තු මන්ත්‍රී දුමින්ද දිසානායක මහතා පවසයි.
පසුගියදා එම ගබඩා සංකීරණය නිරීක්ෂණය කිරීමෙන් අනතුරුව ඒ මහතා මේ බව පැවසීය.
ප්‍රදේශයේ ගොවි මහතුන් පිරිසක් විසින් මෙම වී ගබඩා සංකීරණය විනාශ වෙමින් පවතින බවට කළ දැනුම්දීමක් මත දුමින්ද දිසානායක මන්ත්‍රීවරයා එය නිරීක්ෂණය කරනු ලැබීය.
වී, බඩඉරඟු ඇතුළු ධාන්‍ය විශාල ප්‍රමණයක් ගබඩා කළ හැකි ගබඩා 04 කින් සමන්විත මෙම ගබඩා සංකීරණය කෘෂිකර්ම අමාත්‍යංශය යටතේ පවතින, වී අලෙවි මණ්ඩලය හා ආහාර ප්‍රවර්ධන මණ්ඩලයට අයත් බව එහිදී ගොවීන් දුමින්ද දිසානායක මන්ත්‍රීවරයාට පැවසීය.
අදාළ වී ගබඩා සංකීරණය මුරකුටියක්,කාර්යාලයක්, කාපට් ඇතිරූ අභ්‍යන්තර මාර්ග පද්ධතියක් මෙන්ම වී ගබඩා සංකීරණය වටා අලි වැටක් ඇතුළු සියලු අංග සම්පූර්ණ පහසුකම් වලින් සමන්විත අතර, මෙම සංකීරණය භාවිතයට නොගැනීම හේතුවෙන් මේ වන විට වල් බිහි වී විනාශ වෙමින් පවතී.
එහිදී පැමිණ සිටි ගොවිමහතෙකු ඉල්ලා සිටියේ අනුරාධපුර දිස්ත්‍රික්කයේම වී ගබඩා කර තැබිය හැකි මෙම ගබඩා සංකීරණය කඩිනමින් නැවත ගොවීන් වෙත විවෘත කිරීමට අවශ්‍යය පියවර ගන්නා ලෙසයි.
ඒ අනුව මේ පිළිබඳව කෘෂිකර්ම අමාත්‍යය මහින්ද අමරවීර මහතා සමඟ සාකච්ජා කර, කැකිරාව දුම්රිය නගරයේ වී ගබඩා සංකීරණය කඩිනමින් ගොවි ජනතාව වෙනුවෙන් විවෘත කිරීමට අවශ්‍යය පියවර ගන්නා බවට දුමින්ද දිසානායක මන්ත්‍රීවරයා පොරොන්දු විය.
තිසර සමල් – අනුරාධපුර
